Баспасөз мәслихатына еліміздің Инвестициялар және даму министрлігінің Инвестициялар жөніндегі комитеті төрағасының орынбасары Лариса Жұмағалиева, Польша Республикасының Кәсіпкерлікті дамыту агенттігі төрағасының орынбасары Нина Добжыньская, ЭКСПО-2017 көрмесіндегі Польша секциясының бас комиссары Анджей Стэфаньский мен Польшаның Қазақстандағы Елшілігінің өкілі Томаш Запальский қатысты.
Қыркүйектің 6-7 күндері «Астана ЭКСПО-2017» халықаралық көрмесінде Польшаның Ұлттық күні өтеді деп белгіленген. Соған орай Қазақстан-Польша бизнес-форумын өткізу де жоспарланған. Бұл жалпы Қазақстан-Польша кәсіпкерлерінің екінші форумы. Біріншісі былтыр Варшавада Қазақстан Президентінің Польшаға мемлекеттік сапарының аясында өткен болатын. Ол форумның нәтижесі екіжақты сауда-экономикалық және инвестициялық ынтымақтастықты айтарлықтай жандандыруға мол мүмкіндік ашты.
Польша Даму министрлігінің мәліметінше, 2017 жылдың алғашқы жартыжылдығында екіжақты тауар айналымы 601,9 млн еуроны құрап, 2016 жылдың сәйкес кезеңімен салыстырғанда, 75 пайызға ұлғайған. Қазақстандық экспорт 90 пайызға артып, 389,1 млн еуроны, ал Польша импорты 54,5 пайызға өсіп, 212,8 млн еуроны құраған.
Брифингке қатысушылар форумды ұйымдастыру жаңа экономикалық ынтымақтастықтың бағыттарын талқылауға, соның ішінде бірлескен жобаларды дамыту жағдайы, сондай-ақ, іскерлік байланыстарды одан әрі кеңейту, экономикалық өзара әрекеттестіктің деңгейін кеңейтіп, Қазақстанға поляк инвестицияларын көптеп тартуға мүмкіндік беретінін баса айтты.
Польша Астанадағы ЭКСПО-2017 көрмесіне де белсене қатысуда. «Болашақ энергиясы» атты поляк павильоны заманауи көмір технологиялары, өндірудің жасыл технологиялары, электр энергиясы мен биомассаны өндіру, сондай-ақ, энергетикалық нарықты цифрландыру түрінде ұсынылған. Айтқандай, алдағы ЭКСПО-2022-ні өткізу құқығына поляктің Лодзь қаласы үміткер. Астананың сәтті тәжірибесін ескере отырып, бас комиссар А.Стэфаньский болашақта қазақстандық және польшалық тараптар арасында ЭКСПО көрмесін өткізу бойынша кеңестер ұйымдастыруды жоспарлап отырғанын атап өтті. Сондай-ақ, 7 қыркүйекте ЭКСПО-2017 көрмесі барысында Польша президентінің қатысуымен Польша Ұлттық күніне арналған салтанатты шаралар өткізу көзделген. «Астана Балет» театрында гала-концерт, Польша Үлкен театрының қойылымы мен басқа да шаралар өткізу жоспарлануда.
Динара БІТІК,
«Егемен Қазақстан»