Бұл жолы «Астананың» қақпасын Ненад Эрич қорғады. «Селтик» десе қолынан доп суси беретін Александр Мокинді бапкерлердің дем алдыра тұрғаны бір есептен дұрыс та болды.
Алғашқы минуттардан-ақ ойынның алма-кезек шабуылға толы болатыны байқалып қалды. «Селтиктің» алаңның әр тұсынан ат қойған іс-қимылына «Астана» қаймықпай жауап беріп отырды. Ал, сондай бір сәтте Патрик Твумасидің алыстан тепкен добы «Селтиктің» қорғаушыларын селк еткізгендей де болды. Рас, қонақтар да қарап қалмады: сумаң қаққан сұрмергендері екі-үш рет біздің қақпаға төніп келіп, сес көрсетіп кетіп жатты.
Өкінішке қарай, кездесудің 13-минутында біздің орта тұстағы ойынның берекесін келтіріп жүрген хавбегіміз Ласло Кляйнхайслер жарақат алып қалды. Оның орнына Срджан Граховац алаңға шықты.
Матчтың 27-минутында кезекті шабуылдың бірінде Дмитрий Шомко айып алаңының сыртынан шірене тепкен. Сол кезде қонақтардың қорғаушысы Кристофер Айер допты қайтарамын деп, өз қақпашысын қапы қалдырды. Қатты тебілген доп бағытын күрт өзгертіп, қақпаның оң жақ бұрышын солқ еткізген болатын.
Арада жеті минуттай уақыт өткенде «Селтиктің» шабуылшысы Скотт Синклер жерлестеріміздің айып алаңына сол қанаттан бұзып-жарып кірді де, тура «тоғыздықты» дәл көздеді. Сөйтіп, командалар үзіліске тең есеп жағдайында кетті.
Үзілістен кейін алаңға Марин Томасовты алмастырған Абзал Бейсебеков шықты. Бұл өзгерістің ойын барысында аз пайдасын тигізбегенін айта кету керек.
Матчтың 48-минутында айып алаңына әуелете берілген доп кейін серпілген кезде «Астананың» жартылай қорғаушысы Серікжан Мужиков мергендік танытып, гол санын екіге жеткізді. Іле-шала, Шомкодан пас алған Патрик Твумаси есепті 3:1 қылып өзгертті. Осы голдан кейін «Селтик» шынымен де сасайын деді. «Астана Аренаға» жиылған мың сан көрерменнің қиқуы да жығылғанға соққы болып тигендей. Сасқаны сол емес пе, қонақтардың бапкері Брэндон Роджерс бірінен соң бірі үш ойыншыны алмастырды. Енді, қонақтар тайлы-тұяғы қалмай шабуылға ұмтылған. Міне, осындай сәттің ұрымтал тұсын шебер пайдаланған елорда футболшылары қонақтарды қарсы шабуылмен қапы қалдырды. Твусмаси кездесудің 69-минутында қақпашы Гордоннан айласын асырып, төртінші голды салған еді. Төртінші доп торға түскенде сөнуге айналған үміт оты қайтадан лап етіп, жанкүйер жазған «Астана Аренадан» аспанға ұшып кете жаздаған. Бірақ, қуаныш ұзаққа бармады. Алдымен Оливер Нчам ойынның 82-минутында, одан кейін Гриффитс соңғы минутта екі гол соғып, аптығымызды су сепкендей басты.
Дегенмен, «Астананың» мыңдаған жанкүйерлері алдында намысын аяққа таптатпаған өрлігі ұнады. «Ерлер ырғасып сынасады» деген, өзінен күші басым қарсыласпен ақырына дейін алысып, кеудесін бастырмаған Станимир Стойлов шәкірттері қалай болған күнде де өздерінің һәм күлі қазақ футболының беделін қорғап қалған еді.
Сонымен, «Астана» Чемпиондар лигасындағы жорығын аяқтады. Ал алдағы уақытта өнер көрсететін Еуропа лигасы сынына 48 клуб қатысады. «Астананың» Еуропа лигасының топтық кезеңінде қарсыластары жұма күні белгілі болады.
«Астана» (Астана, Қазақстан) – «Селтик» (Глазго, Шотландия) 4:3 (1:1). Бірінші ойын: 0:5.
Голдар: Айер – автогол 27 (1:0), Синклер 34 (1:1), Мужиков 48 (2:1), Твумаси 49 (3:1), Твумаси 69 (4:1), Нчам 82 (4:2), Гриффитс 90 (4:3)
Ескертулер: Постников 70, Шомко 82, Граховац 90+3
«Астана»: Эрич, Шитов, Аничич, Кляйнхайслер (Граховац 13), Мужиков, Томасов (Бейсебеков 46, Тағыберген 81), Маевский, Твумаси, Кабананга, Постников, Шомко
«Селтик»: Гордон, Биттон, Браун, Гриффитс, Синклер (Армстронг 65), Нчам, Лустиг, Айер, Макгрегор (Рогич 46), Форрест (Рэлстон 57), Тирни
Қайрат ӘБІЛДА,
«Егемен Қазақстан»