Облыс орталығындағы қалалық саябақта этномәдени бірлестіктер арасындағы «Бір шаңырақ аясында» атты фестиваль қалыптасқан дәстүр бойынша жыл сайын өткізіледі. Биыл Ассамблеяның жергілікті филиалы бұл фестивальді ЭКСПО-2017 көрмесіне арнады. Фестивальде чуваш этно-мәдени бірлестігі өз өнерлерін көрсетті. Бірлестік 20 жыл бойы ел бірлігін сақтауда қызмет етіп келеді. Облысқа танымал «Сеспель» чуваш фольклорлық ансамблі халық әндері мен билерін орындады. Қалалық саябаққа жиналған тұрғындар чуваш халқының әндерін тыңдап, мәдениетімен, ұлттық тағамдарымен және салт-дәстүрлерімен танысты. Сондай-ақ, қазақ және орыс әндері де шырқалды. Фольклорлық ансамбль Чебоксарыда өткен жалпыресейлік «Родники Поволжья» фестивалінде лауреат атанған екен.
Мерекеге жиналған жұртшылық чуваштардың дәмді бәліштерінен де ауыз тиді. Этно-мәдени бірлестіктің басшысы Елена Сафронованың айтуынша, жалпы чуваш тілі осыдан он жылдай уақыт бұрын «Қызыл кітапқа» еніпті. Облыста өтетін осындай мерекелерде ұлттық фольклорлық ансамбль жастардың өз халқының салт-дәстүрін, ән-билерін, ана тілін ұмытпаулары үшін қажет.
Ассамблеяда тіл үйрету үйірмелері жұмыс істейді. Бұл мақсатты ойды Чувашиядан келген ұлттық конгресс мүшесі В.Федотов құттықтау сөзінде де атап өтті. Бүгінде өңірде 700-ге жуық чуваш тұрады. Аз болса да бірлігі мен тірлігі жарасқан, түркітілдес бауырластар Қазақ жерін отанындай көріп, ұлттық құндылықтарын сақтап, туған тілдерін жаңғыртып келеді.
Фарида БЫҚАЙ,
«Егемен Қазақстан»
Фото: Мақсат АЙТБАЕВ
Павлодар облысы