Еске салсақ, белгіленген үш ай мерзімінде ЭКСПО-2017 көрмесіне шамамен 2 миллион адам келеді деп жоспарланған болатын. Дегенмен, бұл болжам екі айға жуық уақытта-ақ жүзеге асты. Нақтысында, 4 тамыз күні халықаралық мамандандырылған көрме екі миллионыншы келушіні қарсы алып үлгерді. Ал 25 тамызда ЭКСПО-2017 көрмесіне үш миллионыншы келуші тіркелді. Көрмені тамашалаушылардың басым бөлігі Қазақстанның Ұлттық павильоны – «Нұр Әлемге» айрықша қызығушылық танытқан. Нәтижесінде, тамызда ЭКСПО-2017 көрмесінің басты нысанына келушілер саны миллионнан асып түсті.
Ресми дерекке сүйенсек, ЭКСПО-2017 көрмесіне келушілердің 15 пайызын шетелдік қонақтар құрайды, оның басым бөлігі ресейлік келушілер. Бұл жөнінде «Астана ЭКСПО-2017» ҰК» АҚ төрағасы Ахметжан Есімов мәлімдеді.
– Жоспарланған межеге жеттік, ЭКСПО-2017 көрмесінің басты мақсаттарының бірі туристік саланың қарқынды дамуына ықпал ету болатын. Болжам орындалды. Жұмыс орындары көбейіп, табыс көлемі артты. Әсіресе, шағын және орта бизнес саласында мультиплекативтік әсер жақсы байқалды. Елордалық қонақүйлердегі меймандар саны екі есе көбейді. Дәл осындай көрсеткіш мейрамханалар мен қоғамдық тамақтану орындарында да байқалады, – дейді Ұлттық компания басшысы.
Сондай-ақ, Ахметжан Есімов жақында ЭКСПО-2017 көрмесі нысандарын пайдалану жоспары бекітілгенін жеткізді. Көрме жұмысы аяқталғаннан кейін, ЭКСПО аумағында профилактикалық жұмыстар жүргізіліп, негізгі нысандардың жұмысы басталады.
Жаһандық энергетикалық төңкерістің озық технологиялары паш етілген тарихи алаң – «Астана ЭКСПО-2017» көрмесі үш ай бойына талай жақсылықтың жаршысы болды. Тіпті адамзат үшін әрі мол, әрі арзан энергетика көзін ашатын төңкеріс ЭКСПО-2017 көрмесінің павильондарындағы озық жобалар мен жаңа технологиялар түрінде Астанадан бастау алды деуге болады. Қаншама елдің ұлттық күндері өзкізіліп, қала қонақтары мен тұрғындары ерекше елдердің рухани-мәдени шараларынан сусындады.
Ұлттық күндердің өткізілуі алдағы алты күнде де жалғасын таппақ. Мәселен, 5 қыркүйек – Өзбекстанның, 6 қыркүйек – Біріккен Араб Әмірліктерінің,
7 қыркүйек – Польшаның, 8 қыркүйек Ресей Федерациясының ұлттық күндері шеру тартады. Ал 9 қыркүйек күні ұлттық күн сахнасында соңғы концерттік бағдарламалардың бірін Халықаралық көрмелер бюросы ұйымдастырады. 10 қыркүйек күні конгресс-орталықта көрменің ресми жабылу салтанаты өткізіліп, концерттік бөлімі амфитеатрда жалғасады.
Динара БІТІК,
«Егемен Қазақстан»