«Испан тілінде ғаламшарымыздағы 500 миллионнан аса адам тілдеседі. Осы тілді білу кез келген салада қажетке жарайды. Испан тілін білетін адам Ривьера Майя немесе Галапагосс аралдары сынды испан тілінде сөйлейтін көрікті елдерге еркін саяхат жасап, тілдесу жағынан еш қиындық сезінбейтін болады», дейді Мәскеудегі Сервантес институтының директоры Абель Мурсия.
Басқосуда институт өкілдері испан тілі білімін растайтын ресми құжатты қалай алуға болатындығы жайында арнайы сессия өткізді. Қалаған адам өзінің тіл деңгейін тексеріп, DELE испан тілінің дипломы мен тіл меңгеру деңгейін бағалайтын SIELE халықаралық сервисінің электронды сертификаты сынды бүкіл әлемде мойындалған құжаттарды алу үшін емтихандарды қалай тапсыру қажет екендігі жөнінде ақпарат алды.
Испан тілінің күнінде әдебиет те әңгімеге арқау болды. Оқу орнының мәдениет бөлімі жетекшісі Татьяна Пигарёва Мигель Сервантестің «Ламанчтық айлакер идальго Дон Кихот» романының бас кейіпкерінің қазіргі замандағы интерпретациясы туралы дәріс оқыды.
«20 ғасырда Дон Кихоттың бейнесі өз ісіңе нық сеніммен қарау идеясымен тығыз ұштасты. Қазіргі заманымызда Дон Кихот бүгінгі өркениеттің бас бейнесіне айналып отыр. Егер адам өз ісіне сенсе, ол біздің өмірдегі қандай қиындық болмасын, әлбетте, жеңе алады деген ой жатыр. Испания павильонының тақырыбы климатты жандандыруға, экологиялық көзқарастың жеңісіне арналған. Ал бұл – нағыз донкихоттық мақсат. Әлемді жұтатқан техногендік өркениетте қалай жеңіске жетуге болады? Адамзат тірі ғаламшарда өмір сүруі қажет деген донкихоттық сенім ғана адамдардың экология мен энергияға қатысты көзқарасын өзгерте алады», деді Т.Пигарёва.
Шара кезінде Испанияның мәдени және туристік мұрасы бейнеленген 90 шаршы метрлік интерактивті карта таныстырылды. Содан кейін испаниялық музыканттар – сазгер әрі әнші Мария Арналь мен гитарашы Марсель Бажес өнер көрсетті.
Асхат Райқұл,
"Егемен Қазақстан"