Аталған шараны «ҚазМұнайГаз» АҚ HR-блогы ұйымдастырды. Негізгі мақсат –трансформация барысында ұйымдық құрылымда болып жатқан өзгерістер туралы компания қызметкерлерін хабардар ету, Job Matching жобасының мазмұнын түсіндіру.
Жиында «ҚазМұнайГаз» ҰК» АҚ басқарма төрағасы Сауат Мыңбаев және адами ресурстарды басқару жөніндегі вице-президент Серік Әбденов сөз сөйледі. Басшылардың мәлімдеуінше, қазіргі таңда компания әлемдік талаптарға сай, заманауи өзгерістерді қабылдау үдерісінде маңызды шешімдерді қабылдауда. Мәселен, компания жаңа ІРО-ға шығуға дайындалуда, сондай-ақ адами ресурстарды басқарудың жаңа моделін енгізіп, үдерістердің бөлігін (HR, ІТ, бухгалтерия, қазынашылық) Жалпы қызмет көрсету орталығына шығармақ. Ал аталған үдерістер түрлі деңгейдегі лауазымдарға қойылатын біліктілік талаптарының өзгеруіне әкелетіні белгілі.
Сондықтан ҚМГ-ға енгізілетін адами ресурстарды басқарудың жаңа моделі функционалдың өзгеруіне байланысты бизнесті компания талап ететін білікті кадрлармен қамтамасыз етуді мақсат тұтады. Ендеше Job Matching дегеніміз, қарапайым тілмен түсіндірсек, лауазымның талаптарына сәйкес кадрларды іріктеу болып отыр. Ал кадрларды іріктеу – трансформация бағдарламасының негізгі талабы. Өйткені транс-
формациялаудың нәтижесінде құрылым өзгереді. Әкімшілік кадрлар қысқарады, бұл ретте лауазымдар саны азаяды. Ол лауазымдарға деген талаптар өзгереді.
Әрине, Job Matching – конкурстық процедура. Басқарма төрағасы Сауат Мыңбаевтың мәлімдеуінше, осы күнге дейін осындай конкурспен 25 лауазымға тағайындаулар болған. Оған 63 үміткер қатысып, ішінен тек 25-і ғана іріктеліп алынған. Оның 17-сі ҚМГ-да бұрыннан жұмыс істеп жүргендер болса, 8-і сырттан келген білікті мамандар. Осындай тағайындаулардың енді келесі легіне конкурс өткізілмек, бүгінгі жиналыс соған түсінік жұмыстарын өткізу, дейді төраға. Сондай-ақ ол Job Matching жобасының маңыздылығын әрі заманға сай екенін атап өтті. Сонымен бірге жоба кез келген компанияның бәсекедегі негізгі артықшылығы болып табылатын қажетті біліктілігі мен тәжірибесі бар, дағдылар мен білімін дамытқысы және білгісі келетін кәсіпқойлар штатының іргетасын қалайтынын жеткізді.
Адами ресурстарды басқару жөніндегі вице-президент Серік Әбденов жобаның жүзеге асырылу барысына тоқталды. С.Әбденовтің айтуынша, компанияның кадр блогы бос орын лауазымдарына орналасуға арналған іріктеудің айқын да жүйелі рәсімі болып табылады. Ағымдағы жылы Job Matching рәсімі құрылымдық бөлімшелер басшыларының корпоративтік функциялары, Тасымалдау, Қайта өңдеу және мұнай маркетингі дивизиондары; Ішкі аудит қызметінің желілік қызметкерлері және «Өндіру және бұрғылау технологиясы» ҒЗИ еншілес компаниясының басшылығы позициясында өтетін болады (113 позиция).
Жобаның алғашқы кезеңі – функционалдың жаңартылғаны және жаңа біліктілік талаптарын ескере отырып, лауазымдық нұсқаулықтарды жазу. Екінші кезеңде әрбір лауазымды грейдтеу (бағалау) өтеді, компанияның жалпы ұйымдық құрылымында оның «салмағы» анықталады, жалақы шегінің мақсатты диапазоны айқындалады. Мұның бәріне PWC, Корн Ферри/Хэй Групп сияқты жетекші халықаралық компаниялардың, сондай-ақ қорда осыған ұқсас жобаны іске асыруда тәжірибесі бар «Самұрық-Қазына» корпоративтік университетінің сарапшылары тартылады.
Лауазымдық нұсқаулықтарды және грейдтерді бекіткеннен кейін кандидаттарды іріктеу басталады. «Ең алдымен, жаңа біліктілік талаптарына сай келетін ішкі қызметкерлерге көңіл бөлінетін болады», деп атап өтті С.Әбденов. Конкурстық негізде бірінші кезектегі тәртіппен компанияның кадр қызметі іріктеген және бірнеше жылдар бойы дамытқан лауазымда отырғандар, бірыңғай кадр резервіндегі кандидаттар, сондай-ақ еншілес ұйымдардың болашағынан үміт күттіретін қызметкерлері қарастырылатын болады. «Егер конкурс ішкі кандидаттар бойынша жеткілікті санды шығармаса, не олардың кандидатураларынан конкурстық комиссиялар бас тартса, біз HR нарығында іздестіруді жүзеге асыратын боламыз», деді С.Әбденов.
Конкурстық іріктеуге қатысуға таңдап алынған кандидаттардың әрқайсысы жеке іскерлік біліктілігінің деңгейін айқындау үшін тестілеуден өтеді, қысқаша уәждемелік эссе жазады және соңғы үш жылдағы жеке жетістіктерінің тізбесін ұсынады. Конкурстық комиссиялардың құрамына ҚМГ-нің бейінді басшылығының өкілдері, сондай-ақ «Самұрық-Қазына» қорының өкілдері енеді. Жаңа кандидат іздестіру қажеттігі жөніндегі шешім болған жағдайда тиісті ақпарат көпшілік назарына жеткізіледі.
Аталған лауазымдар бойынша конкурстық комиссиялардың отырысын 2017 жылдың соңына дейін өткізу жоспарлануда, ал 2018 жылы осындай рәсімдер ҚМГ-нің корпоративтік орталығы мен еншілес компанияларының қалған позицияларына да қолданылатын болады.
Ақпараттық сессияның соңында пікір алмасылып, компания басшылығы жиналғандардың сұрақтарына жауап берді.
Динара БІТІК,
«Егемен Қазақстан»
