Сайлау бұдан бұрын жүргізілген азаматтарды биометрикалық тіркеудің нәтижесі арқылы жүзеге асырылды. Мұндай сайлаушылардың жалпы саны 3 миллион 25 мың 770 адам болатын. Президенттікке алғашында кандидат ретінде 12 адам тіркелген еді. Оның біреуі – «Өнігу-Прогресс» партиясының атынан түскен Бақыт Төребаев сайлауға санаулы күн қалғанда өзінің кандидатурасын Омурбек Бабановтың пайдасы үшін алып тастады.
Сайлау биометрикалық-электронды тәртіппен жүргізілгеніне байланысты дауыс беру аяқталған кешкі сағат 20.00-ден оншақты минут өткенде кімнің алда екендігі белгілі болды. Кешегі күнгі мәліметке сәйкес, сайлау учаскелеріне келгендердің 55 пайызға жуық дауысына Сооронбай Жээнбеков ие болған. Енді ол ОСК-ның ресми қорытындысынан кейін Қырғыз Республикасының президенті деп жарияланбақ. Техникалық жағынан алғанда сайлау әділ өткен. Мұны халықаралық байқаушылар да растап отыр. Биометрикалық технология «1 сайлаушы – 1 дауыс» ережесіне негізделген. Бірақ моральдық-психологиялық жағынан алғанда, сайлауды әділ өтті деп айту әзірге ертерек сияқты.
Сооронбай Жээнбеков елдің қазіргі президенті басқаратын Қырғызстанның социал-демократиялық партиясынан кандидат ретінде ұсынылды.
Назарбек САТТАР,
арнайы «Егемен Қазақстан» үшін
