Бүгінгі таңда Мемлекет басшысының салмақты да салиқалы саясатының арқасында ұлттық қауіпсіздікке, еліміздегі қоғамдық тәртіпке, ішкі тыныштығымызға нұқсан келтірер залалдардың республика аумағында пайда болуына айтарлықтай алғышарттар жоқ. Десек те, қазіргі заманғы барлық қауіп-қатерлердің адамзат баласына ортақ екендігіне ешкім таласа алмайды. Ол бір адамның немесе бір мемлекеттің ғана басына төніп тұрмағандығын дүниежүзілік қоғамдастық, әлем жұртшылығы мойындады. Тіпті барлық жағынан дамыған өркениетті елдердің өзі қауіп-қатердің бірі болып саналатын халықаралық лаңкестіктің алдында өздерінің дәрменсіздіктерін көрсетті. Мұндай мәселелерді қашанда тынымсыз ізденіс, күш біріктіру, бір мәмілеге келу секілді парасатты қадамдар ғана шеше алары сөзсіз. Елбасы Н.Назарбаев бұл жөнінде: «Біздің заманымыздың ерекшелігі терроризмге қарсы белсенді күрес болып отыр. Әлемде терроршылардың айуандық әрекеттерінен қорғалған, сірә, бірде-бір мемлекет жоқ. Онда ешбір кінәсіз бейбіт азаматтар қаза табуда. Халықаралық терроризмге, діни экстремизмге, есірткі тасымалы мен басқа да қауіп-қатерге қарсы күресте біз үшін өңірлік және халықаралық күш-жігерлерді шоғырландыру аса маңызды», деп бүкіл адамзат қоғамына қатер төндіріп отырған бүгінгі күннің өткір мәселелерін барлық бейбітшілік сүйгіш елдермен бірлесе шешуі қажеттігін алға тартқан болатын.
Соңғы уақыттары елімізде түрлі діни ағымдардың жаңбырдан кейінгі саңырауқұлақтай қаптап кеткені жасырын емес. Иегова куәгерлері, «Хизб-ут-Тахрир» діни-экстремистік ұйымы, саентология, кришна және тағы басқа да экстремистік топтар жегі құрттай елдің ішіне іріткі салып, ата дәстүр, салт-сенімнен адастыруға күн-түн демей дамылсыз күш жұмсауға бар. Діни іріткі салушылардың арқасында қоғамды дүрліктірген оқиғалар да аз бой көрсетіп отырған. Әріден қозғамай-ақ, өткен жылы маусымда Ақтөбе қаласында орын алған қанды оқиға соған нақты дәлел болады.
Ендігі кезекте еліміздің дін саласындағы саясатына, жастарымыздың діни көзқарасы жөніндегі тәрбиесіне бейжайлықпен қарауға мүлде болмайды. Өйткені қазіргі қоғам қауіпсіздігінің аса маңызды тармағы ол – діни тәрбие. Сондықтан сақтық шараларына ел болып қамдана білгеніміз жөн әрі оған қоғамның барша институты оның меншіктік нысанына қарамастан атсалысуы тиіс. Ол үшін барша адамзатты сүюге, имандылық пен адамгершілікке баулитын қастерлі ислам дінінің құндылықтарын жастарымызға жүйелі түрде насихаттап, қатерлі діни-сепаратистік ұйымдардың қоғамдағы астыртын саясатының ара-жігін ашып түсіндіргеніміз жөн. Ұлттық ұлан сапында бұл мәселеге жіті назар аударылып, діни экстремизмнің пайда болуы, оның адамды адастырушылықтағы әдіс-тәсілдері мен тетіктерін саралап, одан сақтану жайлы толыққанды тәрбие беріліп келеді. Ендігі кезекте бұл діни тәрбие жұмыстары мектептен бастап барлық қоғамдық мекемелерде атқарылса құба-құп. Сонда ғана төрт құбыламыз түгенделері сөзсіз демекпін.
Сабыржан СҮЛЕЙМЕНОВ,
полковник, Ұлттық ұланның «Оңтүстік» өңірлік қолбасшылығы қолбасшысының тәрбие және әлеуметтік-құқықтық жұмыстар жөніндегі орынбасары
Алматы
