Әлемдегі ең көне өркениет ошақтарының бірі, Фирдоуси, Хайям, Саади және Хафиздың Отаны. Иран десе көңілімізде Парсы елінің салтанатты сәулет өнері, мешіттердің күн түстес күмбездері, көздің жауын алар оюлары мен нақыштары, әсем ыдыс–аяғы мен үй жарақтары, көне сарайлар мен кітап беттерінің қайталанбас миниатюралары, сурет өнері мен қолөнері қылаң беретіні сөзсіз. Иран мәдениеті мен қолөнері әлемдік өнер мұрасы мен жетістіктері айдынында өзіне лайық орны мен құрметін тапқан және өнер сүйер қауым үшін әрқашан асыға күтетін мерекеге айналған.
Аталған көрмеде Иран қолөнерінің талантты өнерпаздарының, суретшілерінің, миниатюршыларының, көркем жазу және ағаш өнері шеберлерінің туындылары көрермен назарына ұсынылады. Сонымен қатар көркем жазу өнері бойынша шеберлік сабақтары өткізіледі.
Көрменің ашылу салтанатына Алматы қаласындағы Иран Ислам Республикасының Бас консулдығы жанындағы мәдени өкілдік басшысы Сейед Джавад Джалали Киясари, Бас консул Хамид Реза Аршади, қазақстандық мәдениеттанушы ғалымдар, өнертанушылар, ұстаздар мен студенттер қатысты.
Өнердің тылсым сырын ұқтырар ғажайыптар қойылған көрмеде мозаика, миниатюра, ағаш ою және жазу өнері экспонаттары сізге сол сырдан үзік-үзік ой айтар деп ойладық. Қағаз бен темір бетіне төгілген мың-сан өрнектер қиялыңды әлдилеп қанат бітіргендей болады.Тамсанып көріп керемет өнерге таңдай қағасыз.
Сапарбай ПАРМАНҚҰЛ,
«Егемен Қазақстан»
АЛМАТЫ
