Іргесі 1938 жылы қаланған өнер шаңырағының облыс театрлары арасынан суырылып шығып, жақында ғана «академиялық» жоғары мәртебе иеленгеннен кейінгі алғашқы сапарын руханият астанасы Алматыдан бастауы тегін емес. Астананың 20 жылдығы мен «Рухани жаңғыру» бағдарламасы аясында өтетін гастрольдік сапарға байланысты өткен баспасөз жиынына модераторлық жасаған Қазақстанның еңбек сіңірген қайраткері Әлия Бөпежанова үлкен тұлғалар басшылық жасаған театрдың тарихына аз-кем тоқталып, өткеніне шолу жасады.
Атырау театрының алғашқы ұйымдастырушыларының қатарында қазақтың ұлттық кәсіби театр өнерінің негізін салушылардың бірі Жұмат Шаниннің есімі аталады. Шаниннің басына бұлт үйіріліп, Мәскеуден көңілсіз қайтып келе жатқан жолында Орал қаласына түсіп қалып, сол жердегі театрдың көркемдік жетекшісі болып қызметке қалады. Жайық өзенінің жағасына алқа-қотан қонған көршілес Атырау облысына гастрольдік сапармен келеді. Бұл кезде Атырауда алғашқы өнер студиясы ашылып, Шанин жаңадан ашылған студияның жас буын өкілдеріне сабақ беріп, ақыл-кеңесін айтып, сахнада ойнауға талпынғандардың тұсауын кеседі. Жұмат Шанин секілді кәсіби маманның тағылымын көргендер театр өнерінің өзіне ғана тән дәстүр-мектебін қалыптастырып, талай мықтының майталман атанып, маңдайы жарқырап танылуына жол ашады.
Жуырда өткен «Сахнагер- 2018» ұлттық бәйгесінде «Ең үздік менеджер» атанған театрдың директоры Берік Жәменов сапар мақсатын былайша түсіндірді.
– Кезінде М.Әуезов атындағы театрдан кейінгі, жалпы еліміздегі екінші тұлғалы театр Махамбет атындағы Атырау драма театры болғанын ескі көздің бәрі де тегіс мойындайды. Былтыр мен биыл театр үшін жақсылыққа толы жылдар болды. Әр театрдың өрлеуі, бағы жанатын кездері болады. Театр құрамы жастармен, жаңа режиссерлермен толығып, өткір, мазмұнды дүниелерді сахналауды қолға алдық. Алматылық көрермендерге Р.Киплингтің «Маугли», Иран-Ғайыптың «Сүйінбай», Ш.Айтматовтың «Мәңгүрт», «Бетпе-бет», Е.Домбаевтың «Келін» және Р.Отарбаевтың «Бас» драмалары ұсынылып отыр, – дейді театр директоры Берік Жәменов. Сондай-ақ ол аталған академиялық қазақ драма театрынан жастар театрын бөлек шаңырақ етіп шығарып, облыста екінші облыстық театр құру жоспарда бар екенін айтты.
Айгүл АХАНБАЙҚЫЗЫ,
«Егемен Қазақстан»
АЛМАТЫ
