– Басқа да картиналарды түсіруге қатар ұсыныстар түсіп жатса да, бір фильммен ғана айналысамын. Мен қазір барлығынан да бас тарттым. Өйткені «Айканы» аяқтауым керек. Бүгінде тек осымен ғана айналысып отырмын, – дейді картина режиссері.
Бір қызығы, бұл картина толық түсіріліп бітпей жатып-ақ Канн кинофестивалінің басты байқауына шақырылды. Іріктеушілер толық түсіріліп бітпеген фильмнің алғашқы 40 минутын көргеннен кейін, бірден оны кинофестивальге қатыстыруға шешім қабылдаған.
Фильм сценарийін жазған Геннадий Островский де бітпеген картинаның Канн кинододасынан табылуының өзі көп жәйтті аңғартатын алға тартады.
Түсіру тобы тағы бір құпияның шетін ашып отыр. Аталмыш картина кинофестивальге тек 17 мамырдың кешінде ғана жетеді. Ал кинофестиваль 19 мамырда мәреге жететіндігін ескерсек, бұл – өте үлкен тәуекел.
Қазақстандық продюсер Гүлнара Сәрсенова Сергей Дворцевойдың 2008 жылы Канн кинофестивалінің «Ерекше көзқарас» байқауында бас жүлде алған «Жауқазын» деп аталатын фильміне де продюсерлік еткен. Ал Аустралияда бұл фильм «Азиялық Оскар» иемденсе, басқа да 20 шақты кинофестивальде түрлі атаулы жүлделерді жеңіп алды.
«Айка» әлеуметтік кинодрамасы Мәскеуде жұмыс істеп жүрген қырғыз қызының ішкі қарама-қайшылықтарымен күресін, рухын әйгілі етеді. Басты рөлде ойнайтын Самал Еслямова Солтүстік Қазақстан облысында дүниеге келген. Петропавлдағы өнер колледжін аяқтаған соң, ГИТИС-ке қабылданады. Самал Сергей Дворцевойдың «Жауқазын» фильмінде басты рөлдердің бірін бейнелеген болатын.
Айнаш ЕСАЛИ,
«Егемен Қазақстан»
АЛМАТЫ