Атаулы мерекеде татар халқының ән-жырлары шырқалып, ұлттық ойындарынан сайыс өтті. Татарстанның еңбек сіңірген мәдениет қызметкері, даңқты спортшы Ром Ильматовтың айтуынша, «Татарча курәс» ойнына қатысушылардың санында шек болмады.
Бесқарағай ауданынан арнайы келген башкөлдік татар ағайындар ұлттық тағамдарынан дәм ұсынды. Барлығы жиналып, Татар халқының талантты ұлы Ғабдолла Тоқай ескерткішінің басына гүл шоқтарын қойды. Елді берекелі тірлікке бастайтын шара татар халқының дәстүрі бойынша имамның тілек айтуымен басталды.
Шараға Семей қаласының әкімі Ермак Сәлімов, облыстық ішкі саясат басқармасының басшысы Нелли Краснобаева, Бесқарағай ауданының әкімі Дәулет Батырбаев қатысты.
– Құрметті семейліктер және қала қонақтары! Ынтымақ-бірлігі жарасқан, Абай, Мұхтар, Шәкәрімдер туған қастерлі өлкеде біз бауырлас татар халқының «Сабантой» мерекесін бесқарағайлық бауырларымызбен бірге тойлаудамыз, – деді Семей қаласының әкімі Ермак Сәлімов. – Бейбітшілікке, береке-бірлікке шақыратын бұл мереке біздер үшін аса қымбат. Сондықтан баршаңызға мықты денсаулық, отбасыларыңызға амандық тілеймін, мереке құтты болсын!
Облыстық ішкі саясат басқармасының басшысы Нелли Краснобаева облыс әкімі Даниал Ахметовтің атынан жиналған қауымды құттықтап, арнайы марапаттарын табыс етті. Бесқарағай ауданында Достық үйінің жұмысын жандандырғаны үшін аудан әкімі Дәулет Батырбаев алғыс хатпен марапатталды.
Еңбек ардагері Рашида Хасанованың айтуынша, «Сабантой» – татар тілінде «жер өңдеу тойы» деген мағынаны білдіреді екен. Яғни Сабантой татар халқының жерді өңдеп, егін салатын көктем кезеңінің мерекесі. Оның өзегіне егін бітік шықсын, жиын-терім мол болсын, ел тоқ болсын деген арман-тілектер жинақталған. Мерекеде татар халқының ұлттық ойындары – татар күресі, арқан тарту және тағы да басқа көптеген спорттық ойындар ойналды. Сабантойға келгендер татар елінің ұлттық тағамдарынан дәм татып, концерттік бағдарламаны тамашалады.
Раушан НҰҒМАНБЕК,
журналист
СЕМЕЙ