Егер әр адам өзінің саулығын жас кезінен күтпесе, оны қадағаламаса ертең өршіген дерт күш бермей кетуі әбден мүмкін. Бұл ретте Астана мен Алматы қаласында студенттерге арналған емханалар болашақ мамандардың денсаулығының күзетушісі міндетін абыроймен атқарып келеді. 1999 жылы Қ.Жұбанов атындағы Ақтөбе мемлекеттік университетінің жанынан ашылған студенттер емханасы өңірлер арасында тұңғыш рет құрылды. Аталған емхана 19 жыл бұрын студенттерге сапалы амбулаториялық-емханалық көмек беру және оның қолжетімділігін көтеру үшін ғылыми кеңестің шешімі бойынша ұйымдастырылған болатын. Сол уақыттан бері мұнда ауру түрлерін ерте бастан анықтау мен диагностикалау жұмыстары жүйелі түрде жүргізіліп келеді. Ауырып ем іздегенше, ауырмайтын жолды іздегеннің артықшылығы әлдеқайда көп. Осы орайда өңірлік студенттер емханасындағы 32 жоғары және орта арнаулы білімі бар медицина қызметкерлері жүргізген профилактикалық сауықтыру шараларының шоқтығы бәрінен де биік тұрады. Оның аясы жоғары оқу орнындағы 11 мыңнан астам студентті қамтитынын ескерсек, мерейлі қызметтің мәртебесі одан әрі биіктей түседі. Арнайы медициналық мекеме тиісті материалдық базамен, заманауи қондырғылармен және білікті медициналық кадрлармен қамтамасыз етілген. Өңірде құрылған студенттер емханасының басты қызметі клиенттерге тегін медициналық көмектің кепілді көлемін беруге бағытталған.
Мұнда медицина мекемесінің бастауында, яғни ашылуы мен қалыптасу кезінде болған білікті мамандар тобы әлі күнге дейін студенттерге сапалы медициналық көмектер көрсетіп келеді. Солардың бірі Қ.Жұбанов универститеті студенттер емханасының меңгерушісі Жұмагүл Жұмағазина.
– Бүгінгі денсаулық сақтау саласындағы басым бағыттардың бірі – студент жастардың денсаулығын сақтау мен қадағалау болып отыр. Бұл іс бәрімізге күрделі міндеттер жүктейді. Оған кәсіби біліктілік пен шеберлікке қоса ерекше мейірім аялы алақан қажет деп білеміз. Ұжымдағы барлық қызметкерлерге осындай үйлесім болуын ылғи айтып жүремін. Өйткені туған топырағы мен ата-анасынан, әрі туып өскен бауырларынан жырақта жүрген жас денсаулығынан кінәрат табыла қалса ең алдымен бізден жылы сөз күтеді. Біз осы үдеден шыға білуге тиіспіз, дейді ол.
Жоғарғы оқу орнындағы студенттік өзін өзі басқару ұйымының өкілдері студенттік емхананың қызметіне дән риза екендіктерін жеткізді.