Қаза тапқандардың көбі Афиныдан 40 шақырым қашықтықтағы Мати ауылын тастап кете алмаған. Ресми дерекке сүйенсек, қайтыс болғандардың басым бөлігі түтінге тұншыққан екен. Грекия үкіметі алапат орман өртінен зардап шеккендерге көмек көрсету үшін 20 млн еуро бөлді. Тілсіз жау әлі сөндірілген жоқ. Құтқару жұмыстарына 100-ден астам өрт сөндіруші тартылған. Қазіргі таңда қайықтар мен тікұшақтар арқылы отқа оранған аймақтардың тұрғындары қауіпсіз жерге көшіріліп жатыр.
Тіпті Афины қаласына таяу маңды мекен еткен тұрғындар да үйін тастап кеткен. Тілсіз жау елдің оңтүстік-батысынан басталған. BBC арнасының мәліметіне сүйенсек, мұндай ірі көлемдегі өрт кейінгі он жылда болмаған. Соңғы рет 2007 жылы Пелопоннес түбегінде болған тілсіз жаудан ондаған адам қаза тапқан еді. Өрттің бой бермей кетуіне ұйытқып соққан жел де әсер еткен. Кей жерлерде оның жылдамдығы сағатына 120 километрге дейін жеткен екен. Нәтижесінде ауа температурасы 37 градусқа дейін көтеріліп, ылғалдылық азайып кеткен.
The Guardian басылымы 1500-ден астам тұрғын үй зардап шеккенін хабарлады. Сондай-ақ 80-ге жуық автокөлік өртеніп, күлі ғана қалған.
Грекияның премьер-министрі Алексис Тсипрас өрт болған Аттика аймағында төтенше жағдай жарияланғанын мәлімдеді. «Грекия ауыр қазаға ұшырады. Біз қайғыға қарсы тұра білуіміз қажет», деді ол.
Еуропалық одақ келісіміне сәйкес, ел билігі өрт салдарымен күресу үшін ұйымға мүше мемлекеттерден көмек сұраған. Соған сәйкес, Кипрден 60 өрт сөндірушіден құралған арнайы команда жіберілсе, Испания суға қона алатын екі ұшағын ұсынған. Түркия мен Израиль секілді мемлекеттер де көмек қолын созды.
Еуропалық кеңестің төрағасы Дональд Туск қиын сәтте одаққа мүше мемлекеттердің жұдырықтай жұмылатынын жеткізді. «Еуропа осы бір қиын-қыстау кезеңде Грекиядағы достарының қасынан табылады. ЕО елдерінің көмектері Грекияға бет алды», деді ол.
Афины өңіріндегі өрт дүйсенбіде басталды. Бірнеше жерден тұтанған тілсіз жау тез арада айналасының бәрін жалмаған. Бүгінге дейін лапылдаған өрттің бірнеше ошағы сөндірілді. Алайда тілсіз жаудың он шақты ошағы әлі ауыздықталған жоқ.
Жалпы, биылғы жаз Еуропа елдеріне оңайға соқпай тұр. Бұған дейін Швецияның «Артикалық өңір» деп аталатын орманды аймағын жалын жалмаған еді. Тосын апат тұрғындар мекендейтін жерден алыстау аймақта болғандықтан, қаза тапқандар кездескен жоқ. Алайда қауіпсіздік үшін төрт ауылдың тұрғындары алыс аймаққа көшірілген.
Абай АСАНКЕЛДІҰЛЫ,
«Егемен Қазақстан»