Қ.Әбдірахмановтың айтуынша, Палестина министрінің сапары екі ел арасында халықаралық және аймақтық өзекті мәселелер бойынша пікір алмасуға, екіжақты ынтымақтастықтың қазіргі жағдайы мен болашағын айқындауға мүмкіндік беріп отыр.
Оған қоса 26 жылдық тарихы бар қарым-қатынастар аясында Қазақстан мен Палестина саяси, сауда-экономикалық, мәдени-гуманитарлық және басқа да салалардағы байланыстарды одан әрі нығайтуға мүдделілік білдіруде. Оның ішінде қос тарап ауыл шаруашылығы, медицина, білім салалары бойынша қарым-қатынастарды жандандыра түспек.
– Қазақстан Палестинамен екіжақты ынтымақтастықты дамытуға аса үлкен мән береді. Аталған ынтымақтастықтың негізін Қазақстан өз тәуелсіздігін жариялаған кезде 1991 жылы Палестинаны азат ету ұйымының, Палестина ұлттық әкімшілігінің көшбасшысы, марқұм Я.Арафаттың Қазақстанға, сондай-ақ Елбасымыз Н.Назарбаевтың 1995 жылы Палестинаға өткен сапарлары қалады. Биыл екі ел арасында дипломатиялық қарым-қатынастардың орнағанына жиырма алты жыл толды. Осы уақыт ішінде елдеріміз арасындағы екіжақты қарым-қатынастармен бірге, БҰҰ, ИЫҰ және басқа да халықаралық ұйымдар шеңберінде көпжақты ынтымақтастығымыз дами түсті, – деді Қазақстанның Сыртқы істер министрі.
Оның үстіне Палестина мемлекеті халықаралық ұйымдар шеңберінде еліміздің негізгі халықаралық бастамаларына тұрақты түрде қолдау көрсетіп келеді.
Қайрат Әбдірахманов еліміз Палестина проблемасының реттелуі Таяу Шығыс өңірінде ұзақ мерзімді бейбітшілік пен тұрақтылықты орнатудың негізгі шарты болып табылатынына сенім арта отырып, Палестинаны тәуелсіз мемлекет ретінде мойындап, халықаралық қауымдастықтың толыққанды мүшесі болуын дәйекті жақтайтындығын да атап өтті.
– Қазақстанның аталған мәселеге орай ұстанымы өзгеріссіз қалады. Палестиндік-израильдік жанжалдың шешімі 1967 жылғы шекараларда астанасы Шығыс Иерусалим болып табылатын Палестина мемлекетінің құрылуын көздейтін «екі халыққа – екі мемлекет» қағидасы бойынша іске асуы тиіс. Түрлі қиындықтарға қарамастан, келіссөздер процесі әрі қарай жалғасуы керек, – деді өз сөзінде Қайрат Әбдірахманов.
Ал Палестина мемлекетінің Сыртқы істер және экспатрианттар министрі Рияд әл-Мәлки Қазақстан тарапының ыстық ықыласпен қарсы алып, келіссөздер жүргізуге мүмкіндік бергендігі, қиын-қыстау жылдары аймақтық және халықаралық қоғамдастық алдында үздіксіз қолдау білдіріп отырғандығы үшін алғысын жеткізді.
– Біздің байланыстарымыз тек саяси қарым-қатынастармен шектелмейді. Атап айтқанда, туризм, ауыл шаруашылығы, денсаулық сақтау, мәдениет салаларындағы ынтымақты өрістетуге мүдделіміз. Оның үстіне Астана бүгінде аймақтық, халықаралық маңызды хабқа айналды, – деді Рияд әл-Мәлки.
Кездесу барысында еліміздің БҰҰ Қауіпсіздік Кеңесінің тұрақты емес мүшесі ретінде Таяу Шығыста бейбітшілікті орнатудың ажырамас шарты болып табылатын өңірдегі тұрақтылықты қалпына келтіру процесіне толық қолдау көрсетуді жалғастыратыны айтылды.
Сондай-ақ Рияд әл-Мәлкидің ресми сапары аясында Сыртқы істер министрлігі мен Палестина мемлекетінің Сыртқы істер және экспатрианттар министрлігі арасындағы «Саяси консультациялар жөніндегі өзара түсіністік туралы» және Палестинаның Сауда, өнеркәсіп және ауыл шаруашылығы палаталарының федерациясы және «Қазақстанның Сыртқы сауда палатасы» ЖШС арасындағы ынтымақтастық туралы меморандумдарға қол қойылды.
Серік ӘБДІБЕК,
«Егемен Қазақстан»