Бақытжан Жұмағұлов «7–20–25» бағдарламасын іске асыру аясында Сырдария өзенінің сол жағалауындағы тұрғын үй құрылысы жұмыстарының қалай орындалып жатқанын көрді. 2017 жылдың қарашасында басталған «Қараөзек» жоғары технологиялық газды компрессорлық стансасының құрылысымен және осы жылдың сәуір айында ашылған «Q-med» клиникасының жұмысымен танысты. «Электротехнология» ЖШС оқу орталығы мен «Болашақ» университетінде болды.
Достық үйінде облыс әкімі Қырымбек Көшербаев, республикалық қоғамдық кеңестің төрағасы Бақытжан Жұмағұлов, «Нұр Отан» партиясының хатшысы Фархад Қуанғанов және тиісті мемлекеттік органдар өкілдерінің, саяси партия және қоғам белсенділерінің қатысуымен Мемлекет басшысының бес әлеуметтік бастамасын Қызылорда облысында жүзеге асыру бойынша кеңес болып өтті.
Облыс әкімі Қырымбек Көшербаев Мемлекет басшысы тапсырмасының аймақта іске асу барысы туралы баяндама жасады. Аймақ басшысы шағын және орта кәсіпкерлікті қолдау мен микрокредиттер санының ұлғаюы арқылы ағымдағы жылдың 6 айының ішінде өзін өзі тиімсіз жұмыспен қамтыған және жұмыссыз 97538 адамның 27 мыңнан астамы жұмысқа орналастырылғанын айтты.
– Соңғы екі жылдың көлемінде облыс бойынша мемлекеттік қаражат пен жеке құрылыс салушылардың есебінен 500 мың шаршы метрге жуық тұрғын үй пайдалануға берілді. 2017 жылы апатты тұрғын үйлердің мәселесін толықтай шештік. Бұл жұмысты 2013 жылы бастадық. Содан бері апатты үйде тұрып жатқан 500-ден аса тұрғынды жайлы да жаңа баспанамен қамтамасыз еттік. Қызылорда облысының аумағында 1726 пәтерді құрайтын 42 көп қабатты тұрғын үйдің құрылысы жүріп жатыр. Біз 2018 жылды «Жаппай кәсіпкерлікті дамыту жылы» деп жарияладық. Осы мақсатта кешенді «Жол картасын» әзірледік. Оны іске асыруға жалпы есебі 32 млрд теңге бөлуді жоспарлап отырмыз. Оның ішінде 3 млрд теңге стартап жобаларға бөлінеді, деді әкім.
Кездесуді қорытындылаған әлеуметтік бастамаларды іске асыру жөніндегі кеңестің төрағасы Б.Жұмағұлов өңірде атқарылған жұмыстарды жақсы бағалайтындығын айтты.
– Сырдарияның сол жағалауындағы жаңа қаланың салынуына орай бұл бағдарлама тұрғындар үшін тиімді болар деген ойдамын. Сондай-ақ бұл тұрғыда «Орда» бағдарламасы бекітіліп, сәтті тәжірибе жүзеге асырылып жатыр екен. Бұл несие алушылардың аясын кеңейтуге және аталған бастаманы сәтті іске асыруға септігін тигізетіні анық. Мұндай бастама әзірге тек Алматы мен Қызылорда облысында бар. Мұндай тәжірибені өзге де облыстарға да тарату керек деп есептеймін, – деді «Президенттің бес әлеуметтік бастамасын» бақылау жөніндегі республикалық қоғамдық кеңестің төрағасы.
Бақтияр ТАЙЖАН,
«Егемен Қазақстан»