Қатысушылар 6 мың шақырым жолды жүріп өтіп, 6 елдің 30 қаласын қамтиды. Оның ішінде Ресей, Беларусь, Польша, Германия секілді елдер бар. Жобаны таныстыру, достық қарым-қатынасты нығайту және тәжірибе алмасу мақсатында 11 үлкен қалада қоғам белсенділерімен, ерекше қажеттілігі бар адамдармен, спортшылармен және БАҚ өкілдерімен кездесу өткізу жоспарланған. Велошерудің негізгі мақсаты – саламатты өмір салтын насихаттау, велосипедті экологиялық таза көлік түрі ретінде дәріптеу, әлеуметтік және экотуризмді дамыту. Сонымен қатар паралимпиялық спорт түрі ретінде мүгедек жандар арасында бұл спорт түрінің дамуына ықпал ету, жастарды патриоттыққа тәрбиелеу.
«2016 жылы мүгедектігі бар азаматтарға арналған спорттық жарысқа қатыстым, шараның ұйымдастырылу деңгейі өте төмен болды, ешқандай жағдай жасалмаған, қазір бұл спорт түрі бір ізге қойылған. Сол кезде мен өзімізден бастамасақ болмайтынын түсіндім. Міне, бүгінгі веломарафон соның жемісі деп айтқым келеді. Яғни мақсатымыз – зағип және нашар көретін жандар да қоғамның мүшесі екенін, біздің де өздігімізден жүріп-тұрып, қоғамға пайдамызды тигізе алатынымызды дәлелдеу. Сонымен қатар негізгі көздегеніміз – велоспорт пен параспортты насихаттау. Мұндай жоба Қазақстанда тұңғыш рет ұйымдастырылып отыр», дейді «Шекарасыз спорт» жобасының басшысы, «Астана – Париж» велошеруінің капитаны Бахтияр Базарбеков.
Веломарафон Астана әкімдігі, «Нұр Отан» партиясы, Қоғамдық даму министрлігі, «А.Винокуров атындағы спортты дамыту және қолдау» қоры, паралимпиялық комитет, Қазақстан Республикасы спорт велосипеді федерациясы және «Ел тірегі» шағын және орта бизнес қауымдастығының қолдауымен ұйымдастырылып отыр.
«Blind Race Astana – Paris» веломарафонын 4 тамызда Астанадағы «Қазақ елі» монументінің алдында ресми түрде басталды. Спорттық шараны 2018 жылдың қыркүйек айының ортасында веложарыстың отаны саналатын Францияның Париж қаласында аяқтау жоспарлануда. Веломарафон Қазақстан аумағында Астана, Атбасар, Әуликөл және Қостанай арқылы өтіп, әрі қарай Ресей тасжолдарымен Парижге дейін жалғасады.
Әли БИТӨРЕ,
«Егемен Қазақстан»