Іс-шараға ҚХА Төрағасының орынбасары – Хатшылық меңгерушісі Леонид Прокопенко мен Адам құқықтары жөніндегі уәкіл Асқар Шәкіров және ҚХА мүшелері мен Адам құқықтары жөніндегі ұлттық орталықтың өкілдері қатысты.
Құжатқа қол қою рәсімі кезінде Л.Прокопенко бұған дейін қос құрылымның арасында қалыптасқан ынтымақты қарым-қатынастарды жетілдірудің сәті түсіп отырғандығын жеткізді.
Меморандумда тараптардың қоғамдық келісім мен жалпыхалықтық бірлікті нығайтуға, адам құқықтарын қорғауға бағытталған міндеттерді іске асырудағы ынтымақтастығы, жастарды патриоттық, ұлтаралық және мәдениетаралық диалог бағытындағы іс-шараларды өткізуге, азаматтық қауымдастық сезімді қалыптастыру бағытындағы іс-шараларды ұйымдастыруға тарту және қоғамдық келісім саласындағы басқа да мәселелер көзделген.
Ал А.Шәкіров өз сөзінде Мемлекет басшысының ұлтаралық татулыққа, азаматтардың құқықтарының қорғалуына ерекше мән беретіндігін атап өтті.
– Азаматтардың құқықтары ел Конституциясы мен өзге де сабақтас құжаттарда айқын белгіленген. Еліміздің заңдары азаматтарды діни, этностық белгілеріне байланысты қудалауға, қысым көрсетуге тыйым салады. Оны бұзғандарға тіпті қылмыстық жауапкершілік те қарастырылған. 1998 жылы еліміз нәсiлдiк кемсiтушiлiктiң барлық нысандарын жою туралы халықаралық конвенцияға қосылды. 2008 жылы БҰҰ нәсiлдiк кемсiтушiлiкті жою жөніндегі комитетінің өкілеттілігін мойындады. Ең бастысы, Елбасы жетекшілік ететін Қазақстан халқы Ассамблеясы азаматтардың құқықтары мен бостандықтарының қорғалуына сүбелі үлес қосып келеді, – деді Адам құқықтары жөніндегі уәкіл.
Ресми құжаттарға қол қойылғаннан кейін тараптар өзара іс-қимыл шараларының жоспарын талқылады.
Серік ӘБДІБЕК,
«Егемен Қазақстан»
