Жазық далада қаз-қатар тізілген ақшаңқан киіз үйлерді көріп, Арқа төсін әнге бөлеген әдемі әуен естілгенде, бұл басқосудың жөні де, жолы да ерек екені білінгендей еді. 500 жыл бұрын дәл осы Қараегін ауылы маңындағы Шұбыртпалы көлінің жанында Темірқожа баба дүние есігін ашқаны, кіндігінен өрбіген он атаның барлығынан әділ билер, от тілді көсемдер мен шешендер ғана емес, баһадүр батырлар да көптеп шыққаны тарихтан белгілі. Алмағайып заманда азаттық күресінің асқар шыңындай Кенесары хан бастаған шайқастарға Шұбыртпалы елінің батырлары қатысып, ел бостандығы жолындағы күрестің бел ортасынан табылды.
Атаулы датаға арналған алқалы жиынның ажарын ашқан ашық аспан астындағы сахнада театрландырылған көріністер көне тарихтан сыр шертті. Әдепті айтыс, әдемі әнмен тербелген дала төсі жетіген, домбыра, сырнай сияқты ұлт аспаптарымен түрлене, тербеле түсті. Жиналған жұрт Сыр елінен келіп, жырдан шашу шашқан Ә.Ноғайбаев, М.Бекпейісов, А.Ноғайбаева сынды өнерпаздарға дән риза болса, өңірдің жас ақындары да жүйелі сөзімен ел ықыласына бөленді.
Асқа келген айтулы азаматтар, меценаттар Қараегін, Сабынды ауылдарының әлеуметтік тұрғыдан аз қамтылған және толық емес отбасылардың мектеп жасындағы балаларына қажетті киім-кешек, оқу құрал-жабдықтарын тарту етті. «Рухани жаңғыру» бағдарламасы аясында Арқа жұртының арқасын кеңге салып, елдің өткен тарихына тағзым еткен Қараегіндегі асқа үш мыңға жуық мейман жиналды. Өнер бәйгесінен бөлек, жасөспірімдер арасындағы қазақ күресі мен түйе балуандардың да бәсекесі тартысты өтіп, Айбат Сейтен, Әлібек Зекенов, Олжас Шынкеев сынды білекті де жүректі жігіттер олжалы қайтты. Күн екіндіден ауғанда басталған аламан бәйгеде бірінші орынды астаналық тұлпар еншілеп, автокөлік ұтып алса, екінші және үшінші орынды Тараздан келген сәйгүліктер еншіледі. Арқа төсіндегі асты ұйымдастырған «Ағыбай батыр» қорының төрағасы Ғабит Мұсабеков, Марат Дәрібеков, Шахмардан Сыздық, Берік Мырзахметов, Алмай Бимен сынды азаматтардың ерен еңбегіне дүйім халық ризашылық білдірді.
Аида ҚЫДЫРБАЙҚЫЗЫ,
«Егемен Қазақстан»