Осыдан ширек ғасыр бұрын құрылған «Әсем» шаруа қожалығы егіншілікпен айналысады. Соңғы жылдары мал шаруашылығына да түбегейлі бет бұрып отыр. Қазір мұнда 320 бас Қамбар ата, 300 басқа жуық Зеңгі баба, 980 бас Шопан ата түліктері өсіріледі.
Заманауи технологияларды шаруашылықта қолдануды діттеген қожалық иесі Асан Атымтаев жуырда табиғи балдырдан құнарлы азық әзірлейтін инновациялық цех ашып, алғашқы игілігін көре бастады.
– Бүгінде мал дәрілерінің бағасы қымбат. Өнімнің өзіндік құнын кемітетін оңтайлы жолдарды іздестіре келіп мал шаруашылығында хлорелла биотехнологиясының жаңашыл үлгілерін енгізуді, сөйтіп қоғамдық малдарды дәрумені мол, ақуызға бай жемшөп қоспасымен қамтамасыз етуді жөн көрдік. «Бизнестің жол картасы-2020» бағдарламасына қатысып, 2,5 миллион теңгенің грантын жеңіп алдық. Бұл қаражатты малдың иммунитетін жақсартып, түрлі аурулардың алдын алуға мүмкіндік беретін, өнім көлемімен қатар сапасын да арттыратын қоспалар алуға жұмсалады. Әсіресе жас төлдер үшін сұйық ерітінді бірден-бір ем, жақсы қабылдап, ойнақ салып жүр, – деді өзі малсақ жан.
Шаруашылыққа қажетті құрал-жабдықтар Ресейден әкелінген, сондай-ақ арнайы мамандар қысқа мерзімді курс бітіріп келген. Асанның ендігі ойы – ірі қара малының, оның ішінде сүтті сиырлардың санын көбейту. Бұл үшін сауын фермасы талапқа сай жабдықталып, жүз бас асыл тұқымды мал әкелінбек. Қазір 120 сиыр сауылады. 40-қа жуық ауылдасы еңбек ететін қожалық «Сиырдың сүті – тілінде» деген сөзді жақсы түсінген. Құнарлы жемшөптің арқасында сүттің молайғаны, керісінше жұмсалатын шығынның кемігені байқалады.
Өмір ЕСҚАЛИ,
«Егемен Қазақстан»
Солтүстік Қазақстан облысы,
Шал ақын ауданы