Медициналық қызметтерді көрсету сапасын арттыру, денсаулық сақтау саласында сыбайлас жемқорлық көріністеріне жол бермеу – елдің бәсекеге қабілеттілігінің негізгі факторларының бірі. Ендеше, ведомстволардың арасындағы өзара іс-қимыл елдегі және әлемдегі сыбайлас жемқорлықтың жай-күйі туралы ақпараттар алмасу, денсаулық сақтау ұйымдарында сыбайлас жемқорлық тәуекелдерінің сыртқы және ішкі талдауларын жүргізу, сондай-ақ бірлескен жобаларды, акцияларды, семинарлар мен кеңестерді өткізу арқылы жүзеге асырылатын болады.
«2017 жылмен салыстырғанда, биыл жағымсыз фактілердің төмендеу үрдісі бар. Мәселен, 2017 жылы министрліктің Қоғамдық денсаулық сақтау және Фармация комитеттерінің мемлекеттік қызметшілеріне әдеп қағидаларын бұзғаны үшін 18 және мемлекеттік қызметтің беделіне нұқсан келтіргені үшін 21 тәртіптік жаза қолданылды. Ал биылғы 7 айда әдеп қағидаларын бұзғаны үшін 4 және мемлекеттік қызметтің беделіне теріс әсер еткені үшін 1 тәртіптік жаза белгіленді», деп атап өтті Денсаулық сақтау министрі Елжан Біртанов.
Ал өз кезегінде Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы Алик Шпекбаев бүгінгі таңда адами капиталдың маңызды факторы үздік денсаулық сақтау ісі және дені сау ұлт болып отырғанына тоқталды. Сонымен қатар меморандумға қол қоюдың ерекше өзектілігі мен қажеттілігі жүргізіліп жатқан әлеуметтік медициналық сақтандыруды енгізу жөніндегі реформаға, дәрілік заттарды сату кезінде бөлу және бағалық реттеу саласындағы реформаға да байланысты екендігін тілге тиек етті. Меморандумға сәйкес, денсаулық сақтау ұйымдарындағы «тұрмыстық сыбайлас жемқорлыққа» ықпал ететін себептер мен жағдайларды жою шаралары іске асырылмақ.
Динара БІТІК,
«Егемен Қазақстан»