Мерекелік шараға министрден бастап Олимпиада чемпионы, балуан Жақсылық Үшкемпіров, атақты аяқдопшы Сейілда Байшақов, қыздар арасындағы еркін күрестен Олимпия ойындарының күміс және қола жүлдегері Гюзель Манюрова, бокстан Рио Олимпиадасының күміс жүлдегері Василий Левит және тағы басқа бірқатар елімізге белгілі спортшылар мен спорт ардагерлері қатысты.
Салтанатты шара барысында ведомство басшысы еліміздің спортын дамытуға үлес қосып жүрген 30-ға жуық азаматты «Дене шынықтыру және спортты дамытуға сіңірген еңбегі үшін», «Құрметті спорт қызметкері» төсбелгісімен және Құрмет грамотасымен марапаттады. Олардың қатарында «Бокстан Олимпиадалық даярлау орталығы» РМҚК жасөспірімдер құрама командасының жаттықтырушысы Аркадий Топаев, Спорт резерві және әдістемелік қамтамасыз ету басқармасының бас сарапшысы Бахытжан Есжанов, «Күрес түрлері бойынша Олимпиадалық даярлау орталығы» республикалық мемлекеттік қазыналық кәсіпорнының әдіскері Абылайхан Қылышбаев бар.
«Сіздерді Спорт күні мерекесімен құттықтаймын! Спорт – елдің мерейін асырып, абыройын тасытатын сала. Тәуелсіздік жылдары ел спортшылары халықаралық ірі жарыстарда топ жарып, көк байрағымыз асқақтай түсуде. Елбасымыз Нұрсұлтан Әбішұлы Назарбаев спортты дамытуға, саламатты өмір салтына айрықша мән береді», деді А.Мұхамедиұлы.
Ел намысы мен мемлекет абыройын шетелдегі халықаралық ареналарда қорғап жүрген спортшылар мерекесі 2003 жылдың 15 қарашасындағы Елбасының Жарлығына сәйкес жыл сайын тамыз айының үшінші жексенбісінде Спорт күні ретінде атап өтіледі.
Әли БИТӨРЕ,
«Егемен Қазақстан»
