Облыстық кәсіпкерлер палатасы директорының айтуынша, шағын индустриялық аумақ аясында кәсіпкерлерге дайын өндірістік ғимарат пен толық инфрақұрылымы бар кеңсе бөлмелері ұсынылады. Мұның бәріне жеңілдік жасалған. Егер кәсіпкер өз офисін, тігін цехын, наубайханасын, автосервисі мен өзге де ісін ашқысы келсе, шағын индустриялық аумақ бизнесті дамыту үшін барынша оңтайлы мүмкіндік. Бұл аумақ қала шетіндегі «Көкшетау – Астана» күре жолының бойында орналасқан. Жалпы алаң 3,5 гектарды, ғимараттың аумағы 4 мың шаршы метрді құрайды. Шағын индустриялық аумақта дамыған инфрақұрылым, темір жол мен кіреберіс жол бар.
– Шағын бизнес өкілдерінің цех пен өндірістік ғимарат салуға мүмкіндіктері жоқ. Олар бұл нысандарды үлкен кәсіпорындардан жалға алып, қолындағы қаржысын қазіргі заманғы қондырғылар сатып алуға жұмсайды. Сөйтіп бұл қолайлы жағдай шағын бизнестің дамуына көп ықпалын тигізеді, деді Т.Нақыпбеков.
Шағын индустриялық аумақтың қатысушылары облыстық кәсіпкерлер палатасынан кеңестік-құқықтық көмек, бизнес-инкубатор аясында кәсіпкерлікке оқу, өнімді сатуға көмек, жобаларды маркетингтік зерттеу, ақпараттық және сараптамалық ресурстарға қол жеткізу тәрізді қызметтің барлық түрін ала алады. Бұл жобаның ерекшелігі, дамыған инфрақұрылымы бар дайын бөлменің барлығында болып отыр. Мұның бәрі кәсіпкерлерді уақыт пен қаржы шығындаудан босатады.
Байқал БАЙӘДІЛ,
«Егемен Қазақстан»
Ақмола облысы
