Аталған кәсіпорынға «Kazakh Export» экспорттық сақтандыру компаниясы» АҚ қарызды сақтандыру жолымен қолдау көрсетіп, екі жүз миллион теңгені кепілдендіріп отыр. Соның нәтижесінде зауыт өнімдерін экспортқа шығаруға мүмкіндік туды.
«Kaz-Ir Agro» жауапкершілігі шектеулі серіктестігі осы жылдың маусым айында Күншығыс еліне мақсары майын экспорттау туралы келісімшартқа отырған. Жапония елінің мамандары Қазақстанға арнайы келіп, өндірістің сапасын жіті қадағалап, тексеруден өткізіпті. «Kaz-Ir Agro» ЖШС бас директоры Хамидреза Алинагиянның айтуынша, зауыт бүгінде тәулігіне 3 тонна мақсары майын өндіруге қабілетті, қыркүйекте қуатын екі есеге арттыру жоспарланған. Германиядан әкелінген қондырғылармен жабдықталған нысанда 60 адам жұмыс істейді. Зауыт салқындатылған сығу технологиясын қолдануымен ерекшеленеді. Бұл мақсары майының құрамындағы дәрумендер мен пайдалы элементтердің жойылмауы үшін таптырмас әдіс. Сондықтан шет елдерден келетін сұраныс жылдан жылға артып отыр.
Компания бүгінгі таңда Нидерландқа мақсары майын жеткізу үшін бір жылдық келісімшартты жасау жөнінде келіссөздер жүргізуде. Сонымен қатар мақсары майы Қытай, Чехия, Жапония, Ресей және Өзбекстан елдеріне экспортталуда.
Еркежан АЙТҚАЗЫ,
«Егемен Қазақстан»