Тәртіп сақшыларының қызметі қай кезде де қырағылықты талап етеді. Қоғамның тыныштығын сақтауда, түрлі құқықбұзушылықтармен күресуде полицейлердің еңбегі ерекше. Жамбыл өңірінде жыл санап сала мамандарына қамқорлық артып келеді. Соның нақты көрінісі ретінде жуырда орталық «Достық» алаңында облыс әкімі Асқар Мырзахметовтің қатысуымен облыстық Ішкі істер департаментінің қызметкерлеріне 68 бірлік су жаңа патрульдік көліктің кілті табысталды. Бұл көліктер Қостанай қаласындағы өндіріс ошағында құрастырылған. Өз сөзінде өңір басшысы жұмысты талапқа сай атқару үшін материалдық-техникалық базаның да маңызды екенін, сондықтан да бюджеттің мүмкіндігінше жыл санап департамент қажеттіліктерін қамтамасыз етуге тиісті қаржы бөлініп келе жатқанын айтып өтті.
Мәселен, осы жылы аталған саланы жандандыруға 7 миллиардқа жуық қаржы қарастырылған. Бұл көрсеткіш осыдан екі жыл бұрынғы мерзіммен салыстырғанда 1,8 миллионға артық. Өз сөзінде облыстық Ішкі істер департаментінің бастығы, полиция полковнигі Арман Оразалиев аймақ басшысына алғысын айта келіп, алдағы уақытта жемісті жұмыс істейтінін жеткізді. Айта кетейік, 68 бірлік патрульдік техника алуға облыстық бюджеттен барлығы 447 миллион теңге қаржы қарастырылған болатын.
Хамит ЕСАМАН,
«Егемен Қазақстан»
Жамбыл облысы