Форумда сөз болған мәселелер, көбінесе, кәсіпкерлердің өздері өндірген немесе сатуға лайықтаған тауарларын қалай тиімді өткізуге болады, сауда саласында табысқа жетудің сыры неде, өнімді жарнамалаудың қандай әдіс-тәсілдері бар, табысты адам қандай болуы керек деген сұрақтар төңірегінде өрбіді. Бір сөзбен айтқанда, бұл жиынды елімізде бірінші рет өтіп отырған саудагерлер форумы деп атасақ болады.
Күнделікті форумдардан бір ерекшелігі, бұл «атына заты сай болсын» дегендей шоу түрінде өтті. Құлақты жарып, жүректі қатты соқтырып жіберердей қуатты әуен, форумды жүргізушінің тойдағы асабадай жұлқына айқайлаған сөздері залда отырған адамдарды өзіне қарай магниттей тартуға бағытталғандай. Форумға қатысушылардың басым көпшілігі, тіпті түгелге жуығы, кілең жастар болғандықтан бұл әдіс оларға ұнаған да секілді.
Форумды өткізу идеясының авторы «Синергия» ресейлік бизнес мектебінің қазақстандық филиалының директоры Гульнара Гумарова форумға қатысушыларды құттықтау сөзінде бүгін жасалған бұл қадам жиынға қатысушылар үшін бизнес пен өмірде табыстың жаңа деңгейіне көтерілудің соны бір қадамы болып табылатындығын түсіндіріп беруге тырысты. «Форумнан алатындарыңызды алып қалыңыздар» деп ұран да тастап жіберді.
Форумға қатысушыларға сауданың айла-тәсілдерін үйретуде бірінші болып сахнаға шыққан Асылан Қанатов шешендік шеберліктен Қазақстандағы №1 спикер атанған азамат. Әртүрлі компаниялардың қаржы қызметтерінде 12 жылдан астам уақыт жұмыс істепті. Қазір жеке тренингтік компаниясын құрып алған. Бірқатар оқу орындарының штаттан тыс оқытушысы. 358 семинар мен тренинг өткізіп, 7249 адамды оқытқан. Оқытушылық өтілі 5176 сағатты құрайды. Шешеннің сөзі «Сөйле және сата біл» тақырыбында өрбіді. Шынын айту керек, сахна төрінде әрі-бері жүріп, кейде дауысына екпін беріп сөйлеген Асылан көрермендерін жалықтырған жоқ. Мұның себебін де өзі айтып берді. Жұрт алдында сөйлей білу үшін ең алдымен оны сендіре білу керек екен. Бұл үшін, әрине ширақтық қажет. «Сүмірейіп тұрған адамның сөзіне кім сенеді, ондай адам жұртты жалықтырып алады» деген Асылан осы сөзінің дәлелі ретінде сондай адамның кейпіне еніп, баяу сөз сөйлеп көрсетті. Мұндай адамның жұртты өзіне тарта алмайтындығын дәлелдеп берді. Сонан кейін өзінің қызуқанды мәнеріне қайта оралып, жұрт алдында сөйлей білу – тауарды сатудың басты арналарының бірі екендігін түсіндірді. Осының бәрі оқумен, ізденіспен, тәжірибемен келетіндігіне екпін түсіре келе бірдемені үйренуге деген құштарлықтың өзі табыстылықтың 50 процентін қамтамасыз ететіндігіне тоқталып өтті. «Тауарды өткізу үшін алдымен тұтынушыларға жақындай білу керек, өйткені олар саған сенгенде ғана тауарыңды сатып алатын болады. Әдетте өзіміз де қажетті заттарды білетін адамнан сатып алғанды жөн көреміз ғой. Себебі сенім артамыз. Соның сауда дүкеніне барғанды іштей қалап тұрамыз. Сөйтіп ақыр аяғында оның бізге зат қана емес, сонымен бірге «эмоция» сатқандығын да аңғармай қаламыз» дегендей ақыл-кеңестерін айтты. Сонымен қатар тұтынушылардың жан дүниесіне тереңірек бойлаудың бірқатар жолдарына да тоқтала кетті.
Мұнан кейін сөз алған Гил Петерсил Нетворкингтен ТМД бойынша №1 сарапшы екен. Қысқасын айтқанда, тренинг өткізушілердің қай-қайсысы болмасын – өздері атқарып жүрген қызмет саласындағы кіл шеберлер. Гил Петерсилдің сөзі «Бизнесіңізді стратегиялық серіктестіктердің көмегімен қысқа мерзімде өсіре біліңіз» деген тақырыптағы ақыл-кеңестерден бастау алып, соған жетудің жолдарын үйретумен аяқталды.
Жиынға қатысушылардың асыға тосқаны дүние жүзіне әйгілі көрнекті экономист, болашақты болжаушы, «Фанк стиліндегі бизнес» бестселлерінің авторы Кьелл Нордстрем еді. Оны жұртшылық қошеметпен қарсы алды. Кьелл Нордстрем «Матрицадағы өмір – ультразаманауи бизнес құру» тақырыбында сөз сөйледі.
Астанаға алғаш ат басын тіреп отырған әйгілі швед экономисінің бірқатар болжамдары осыған дейін дәлме-дәл деп айтуға тұрарлықтай орындалып қойған. Енді бірқатары заман бағытымен үндестігіне байланысты кеңінен тарап отыр. Сондықтан ол әлемдегі 50 бизнес ойшылдары рейтингінде тоғызыншы орында тұр. Енді автордың кейбір болжамдарын назарға ұсына кетсек, артық болмас.
«Енді 50 жылдан кейін әлемдегі 218 елдің орнында 600 қала қалатын болады. Елдер жоғалмайды, бірақ олардың орнына қалалардың рөлі артады. Мәселен енді 25 жылдан кейін біз Вена мен оның маңайындағы қалаларды бүкіл Аустрия деп есептейтін боламыз. Мұның өзі біздің ақпараттарды қабылдауымыздан, көліктің және бүтіндей алғанда технологиялардың дамуынан туындайды».
«Цифрландыруға лайықтылардың барлығы цифрландырылады. Медицина, қауіпсіздік, білім, әскер – барлығы цифрландыруға көшеді».
«Facebook, Apple, Amazon, Netflix, Google – бұлар жаңа шындықтың негіздері. Олар әлемде өз тәртібін орнататын болады».
«Ақпараттар дамыған сайын ақылымыз азая беретін болады. Өйткені ақпараттық жүйе күн сайын дамуда, ал адамзат оған ілесе алмауда. Бірақ мұның өзі бизнестің дамуына жаңа мүмкіндіктер сыйламақ».
«Жоғары білім құндылығы жойылады. Университеттік жаңа әлемде сізге Гарвардта оқудың қажеті де болмай қалады. Өйткені білім жаңа технологиялар арқылы бәрімізге қолжетімді болады. Енді білім емес, адам қасиеті алға шығады».
Кьелл Нордстрем осындай ойларымен бөлісті. Қоғамда бизнестің рөлі артатындығын айтты.
Сондай-ақ осы күні Қытаймен бизнес жүргізу саласының сарапшысы Дмитрий Ковпак, Бокстан ҚР еңбек сіңірген спорт шебері, 2005 және 2007 жылғы әлем чемпионы Серік Сәпиев, маркетинг бойынша сарапшы, «Синергия» университетінің маркетинг бойынша директоры Дмитрий Юрков, «Синергия» холдингінің негізін салушы және атқарушы директор Вадим Лобов, трафик тарту бойынша сарапшы-практик, DNK club негізін салушы Михаил Колмаков, «Rumi Group» мейрамханалар желісінің негізін салушы әрі басқарушы Қуаныш Шонбай, супермарафоншы, Гиннесс рекордтар кітабының 7 дүркін рекордсмені Марат Жыланбаев жұртшылық алдына шығып, табысқа жету сырымен бөлісті.
Сұңғат ӘЛІПБАЙ,
«Егемен Қазақстан»