Облыс орталығында оң өзгерістер байқалып, тұрғындар үшін қолайлы жағдай қалыптасып келеді. Мәселен, «Жеңіс» саябағы қайта күрделі жаңғырудан өтіп, бүгінде бұл жер көпшіліктің қызыға тамашалайтын орталығына айналды. Саябақтағы жаңадан орнатылған даңқты батыр Бауыржан Момышұлының ескерткіші, «Ерлік» мемориалдық кешені халқымыздың батырлығы мен тектілігін айғақтап тұрғандай.
Сонымен қатар бүгінгі таңда облыс орталығындағы Қайрат Рысқұлбеков атындағы саябақ та күрделі жөндеуден өткізілуде. Келешекте бұл жер де қала тұрғындары мен қонақтары үшін тамаша демалыс орнына айналуға тиіс. Ал Тараз қаласындағы «Үшбұлақ» және «Зербұлақ» арасы қайықпен серуендейтін көл түрінде қайта жаңғыртылады. Жыл басынан бері толастамаған мұндай жұмыстар әлі де жалғасын тауып келеді.
Биыл Жамбыл өңірі үшін табысты жыл болды деуге толық негіз бар. Жаз бойы облыс аудандарын аралап, жұмыс барысымен танысқан Асқар Мырзахметов аудан басшыларына нақты тапсырмалар беру арқылы аудан және ауыл ахуалын жақсартуды басты мәселе етіп қойды. Нәтижесінде өңірдің барлық аудандарында түрлі салалар бойынша оң өсім байқалуда. Атқарылған жұмыстардың нәтижесінде ағымдағы жылдың қаңтар және тамыз айларындағы облыстың әлеуметтік-экономикалық көрсеткіші жоғары деңгейге көтерілді. Экономиканың барлық салаларында өсім байқалды.
Жамбыл облысы әкімдігінің мәліметінше, өткен жылдың тиісті кезеңімен салыстырғанда өнеркәсіп саласында 7,2 процент өсім бар. Осылайша көрсеткіш 254,0 миллиард теңгені құрады. Өсім кен өндіру өнеркәсібінде – 13,3 процентке (29,6 миллиард теңге), өңдеу өнеркәсібінде 6,7 процентке (180,5 миллиард теңге), сумен жабдықтау, кәріз жүйесі қалдықтардың жиналуын және таратылуын бақылауда 0,2 процентке (2,3 миллиард теңге) артуы есебінен қамтамасыз етіліп отыр.
Жамбыл өңірі негізінен аграрлы аймақ болғандықтан, ауыл шаруашылығымен айналысуға мүмкіндік мол. Сол себепті өңірде мал басын асылдандыру, егін орағы жұмыстары да тиісті деңгейде жүргізілуде. Атап айтар болсақ, ауыл шаруашылығында нақты көлем индексі 103,6 процентті құрап, 106,6 миллиард теңгеге жетті. Оның ішінде көрсеткіш өсімдік шаруашылығында – 105,6 процент, яғни 34,6 миллиард теңге, мал шаруашылығында – 102,7 процент, яғни 71,6 миллиард теңгені құраған.
Сонымен қатар өсім өсімдік шаруашылығында масақты дәнді-дақылдар түсімінің 16,4 процентке, мал шаруашылығында ет өндіру 3 процентке, сүт өндіру 2,8 процентке, жұмыртқа өндірісі 3,8 процентке артуы есебінен қамтамасыз етілді.
Негізгі капиталға салынған инвестиция көлемі тиісті кезеңмен салыстырғанда 5,5 процентке артып, 141,8 миллиард теңгеге жетсе, құрылыс көлемі 59,7 миллиард теңгені құрап, 8,2 процентке өсті. Бұл ретте мыңдаған азаматтың баспаналы болуына мүмкіндік туды. Өсім шағын кәсіпорындар атқарған құрылыс-монтаж жұмыстары көлемінің ұлғаюы себепті, атап айтсақ көппәтерлі тұрғын үйлер, мектептер құрылысы, тұрғын үй алқаптарын жылумен, сумен және газбен қамтамасыз ету жүйелерінің құрылысы, магистральді газ құбыры құрылысы және «Темір жол жөндеу» ЖШС жүргізген күрделі жөндеу жұмыстарына байланысты болып отыр. Бүгінгі таңда тұрғын үй құрылысында 311,2 мың шаршы метр тұрғын үй пайдалануға берілді. Бұл 2017 жылдың тиісті кезеңімен салыстырғанда 116,5 процентті құрады.
Бөлшек сауда айналымының нақты көлем индексі 103,9 процентті құрап, 170,1 миллиард теңгеге жетіп отыр. Бұл секторда өңір экономикасын арттыруда айтарлықтай рөлге ие. Инфляция деңгейі 102,5 деңгейінде қалыптасып, орташа республикалық мәннен (Қазақстан Республикасы бойынша 102,9 процент) 0,4 проценттік тармаққа төмен болды. Азық-түлік тауарларын тұтыну бағасы 2,2 процентке көтерілді (Қазақстан Республикасы – 2,3 процент), азық-түлік емес тауарлар 3,2 процентке (Қазақстан Республикасы – 3,6 процент), ақылы қызметтер 2,2 процентке (Қазақстан Республикасы – 3,0 процент) артты. Жүк тасымалы 7,6 процентке, жолаушы тасымалы 2,1 процентке өсті.
Бюджеттің кіріс бөлігі 2018 жылдың 1 қыркүйегіне 170 миллиард теңгеге жетіп, 103,1 процентке орындалды. Негізгі жоспар – 164,8 миллиард теңге. Оның ішінде, жергілікті бюджетке 39 миллиард теңге көлемінде салықтар мен басқа да міндетті төлемдер түсіп, жоспар 115,3 процентке орындалды. Жоспардан артық 5,2 миллиард теңге түсті.
Өткен жылдың тиісті кезеңімен салыстырғанда өсім 16,3 процентті құрады. Сонымен қатар республикалық бюджеттен 131 миллиард теңге трансферттер түсті. Оның ішінде нысаналы трансферттер – 21,6 миллиард теңге және субвенция – 109,4 миллиард теңге болып отыр. Бюджеттік қаражаттар 170,7 миллиард теңгеге немесе 98 процентке игерілген болса, игерілмеген қаражат көлемі 3,4 миллиард теңге. Бүгінде облыс экономикасының өсім динамикасын қамтамасыз ету бағытында қажетті шаралар қабылдануда.
Хамит ЕСАМАН,
«Егемен Қазақстан»
Жамбыл облысы
