Байқаудың талабына сай, әрбір үміткер екі әннен орындап шықты. Бірінші кезекте әлемдік хит әндер орындалса, шешуші кезеңде қазақтың танымал туындылары шырқалды.
Талабы таудай талант иелерін анықтап, оларды шығармашылыққа баулу мақсатында өткен республикалық ән байқауына елімізге белгілі мәдениет қайраткерлері мен әншілер қазылық етті. Қазылар алқасы мүшелерінің бірі, «МұзАрт» тобының әншісі Сәкен Майғазиевтің айтуынша, мұндай өнер байқаулары әншілердің кәсіби деңгейге көтерілуіне тікелей ықпал етеді. Сондай-ақ осыған балама болатын ән конкурстары жиі өткізілсе деген тілек те айтылды.
Сонымен байқау нәтижесі бойынша Дәстүр Асылхан (Астана қаласы), Анар Тәжентаева (Қарағанды облысы) және Айлина Лепесова (Алматы қаласы) дипломант атанса, Павлодардан келген Наталья Процкая көрермендер көзайымына айналды.
Байқаудың үшінші жүлдесіне Мержан Қабдолов (Атырау облысы) пен Жанерке Қабатаева (ШҚО) лайық деп танылды. Түркістан облысының әншісі Ерік Төленов екінші жүлдеге ие болса, бірінші орын Алматы облысынан келген үміткер Қарлығаш Биғазықызына бұйырды. Ал «Жұлдыз-2018» республикалық байқауының Гран-при жүлдесіне Солтүстік Қазақстан облысынан келген Әділхан Макин ие болды.
Конкурста үздік шыққандарға дипломдар мен ақшалай сертификаттар табыс етілді. Байқау соңы конкурс жеңімпаздары мен қазылар алқасының мүшелері және қазақ эстрадасы жұлдыздарының қатысуымен өткен гала-концертке ұласты.
Қайрат ӘБІЛДА,
«Егемен Қазақстан»
ҚАРАҒАНДЫ