Қазір балалардың жан-жақты дамуына толық мүмкіндік бар. Мектеп оқушыларының ғылым-білімнің қыр-сырын ерте жастан меңгерулеріне «Нұр Отан» партиясы да ерекше мән беріп, жақсы бастамаларға ұйытқы болып келеді. Жаңа оқу жылында Атырауда осы бағыттағы жұмыстар жандана бастады. Айталық «Жас Отан» ЖҚ мен «Болашақ» қауымдастығы қолға алған «English for Jastar» атты жоба жоғарыдағы сөзімізге айқын дәлел. Ауыл балаларына ағылшын тілін үйрету мақсатында қолға алынған жоба бойынша Исатай, Индер, Махамбет, Мақат, Жылыой аудандарында 12 ерікті жұмыс істеп жатыр. Оларға барлық жағдай жасалып, баспана, тамақтану, тасымал мәселелері де шешілген. – «English for Jastar» партиялық жобасы екі айға есептелген. Еріктілер 20 қыркүйек пен 20 қараша аралығында ауыл балаларымен жұмыс істеп, аудан жастарының ағылшын тілінде сөйлеу машығын дамытады. Жоба аясында 500-ден астам баланы қамту жоспарланып отыр, – дейді «Нұр Отан» партиясы Атырау облыстық филиалының баспасөз хатшысы Эльмира Түнғатарова.
Сондай-ақ партия бастамасымен балаларға арналған IT-сыныптар ашылды. Британдық «Love to code» бағдарламасының халықаралық білім франшизасы пайдаланылған бұл жоба бойынша арнайы сыныпта 8-16 жас аралығындағы оқушылар білім алады. Оқушылар орталығының басшысы Айзада Түсіпқалиева жоба аясында алты топ ашылғанын, балалардың аталған салаға қызығушылықтары жоғары екенін айтады. Жалпы «Цифрлы Қазақстан» бағдарламасы негізінде облыста 10 IT-сынып балалар игілігіне жұмыс істеуде.
Одан бөлек – Атырау қаласында алғаш рет мектеп жанынан балалар коворкинг орталығы пайдалануға берілді. №2 мектептегі жаңадан ашылған орталықта балалардың бос уақыттарын тиімді өткізулеріне барлық жағдайлар қарастырылған. Енді оқушылар мен ата-аналарға арналған түрлі тренингтер, интеллектуалдық сайыстар, сабақтар осы жерде өтеді. «Қазақстан кітапханалары – Білім орталықтары» партиялық жобасы аясында Атыраудағы 10 кітапхана жанынан коворкинг орталықтары ашылған еді. Ал жаңа орталыққа Атырау қалалық мәслихатының депутаты Әлібек Семғалиев демеуші болды.
Балалардың қарым-қабілеттерін дамыту мақсатында облыста жүзеге асып жатқан игі жобалар баршылық. Осындай жұмыстардың нәтижесінде биыл қосымша білім берумен қамту көрсеткіші 8,6 проценттен 22,4-ке көтерілді.
Бақытгүл БАБАШ,
«Егемен Қазақстан»
АТЫРАУ
