Қазақстанның Бас мемлекеттік санитариялық дәрігері Жандарбек Бекшиннің төрағалығымен өңірлердің алдағы тұмау мен ЖРВИ-дың эпидемиялық маусымына дайындығы, сондай-ақ 2018-2019 жылғы эпидмаусымда сырқаттануды азайтуға бағытталған іс-шаралар туралы селекторлық кеңес өтті. Кеңесте еліміздегі емдеу ұйымдарының тұмауға қарсы вакцинациялауға, тұмаумен және ЖРВИ-мен ауыратын науқастарға бастапқы медициналық-санитариялық, стационарлық көмек көрсетуге дайындығы мәселесі сондай-ақ халық арасында олардың алдын алу бойынша қабылданып жатқан шаралар қаралды. Одан бөлек вирусологиялық зертханалардың тұмау мен басқа да ЖРВИ-ға зерттеу жүргізуге дайындығы талқыланды.
«Біз тәуекел тобын вакцинамен қамтамасыз етудегі жұмыстардың жеткіліксіздігіне алаңдап отырмыз. Бұл бірінші кезекте Қостанай облысы мен Астана қаласына қатысты», деді Жандарбек Бекшин.
Оның айтуынша, барлық медициналық мекемелер эпидемиялық маусымға дайын. Тәуекел тобының адамдарын тұмауға қарсы вакцинациялаумен қамту үшін бюджеттік қаражатқа «Гриппол +» ресейлік вакцина сатып алынған. Оның құрамында А(H1N1), A(H3N2) тұмауына және В типті тұмауға қарсы штамдар антигендері бар. Тәуекел тобына медициналық бақылауға жататын, жиі ауыратын балалар, сәбилер, балалар үйінің жасөспірімдер, мүгедектер мен қарттар үйлерінің контингенті, созылмалы және жүрек-қан тамыры, тыныс алу ағзаларының ауруларымен ауыратын адамдар, медицина қызметкерлері мен жүкті әйелдер жатады. Бұлар ауруға бейім топтар болып саналады. Республика бойынша тұмауға қарсы вакцинациялауды жүргізу үшін 3428 егу пункті ұйымдастырылған, олар қажетті жабдықпен қамтамасыз етілген.
«Астанада вирусқа қарсы вакцина мәселесі тұрақталып келеді. Қазіргі уақытта елордаға 30 мың вакцина жеткізілсе, тағы 50 мыңы әкелінетін болады. Дегенмен, қажеттілік туындаған жағдайда олар жұмыс берушілер тарапынан да, денсаулық сақтау басқармасы тарапынан да сатып алынады деп ойлаймыз. Ал Қостанай облысына 100 мың вакцина керек болса, қазіргі уақытта соның 57 мың дозасы сатып алынған. Қалғанын сатып алуды өтінеміз», деді Ж.Бекшин.
Медициналық көмекті уақтылы көрсету мақсатында шақыртулар мен консультациялар үшін медициналық ұйымдарда 1226 телефон бөлінген, үйге шақыртуға қызмет көрсету үшін 1025 бірлік автокөлік бөлінген, ал ЖРВИ мен тұмаумен ауырған ауыр науқастарды емдеуге жатқызу үшін резервтік 5000 төсек қоры қарастырылған.
Сонымен бірге республиканың медициналық ұйымдарында мамандандырылған көмекті көрсету үшін тұмауға қарсы препараттар қоры құрылған. Қазір Қазақстанда 50 000 қаптама Тамифлю және 10 000 «Реленза» препаратының қоры бар. Стационарлар қарқынды емдеу үшін қажетті жабдықпен және құралдармен қамтамасыз етілген. Дәріханаларда вирусқа қарсы препараттар мен бір рет қолданылатын бетперделердің жеткілікті қоры бар. Осыған дейінгі жүргізілген ақпараттық түсіндіру жұмыстарының нәтижесінде ағымдағы жылы Қазақстанда вакцинациядан бас тартатындардың арасында вакцинация жөніндегі өз пікірлерін өзгерткен адамдардың күрт өсу үрдісі байқалады. Биыл 8 айда олардың 2220-сы екпе алған, ал 2016 жылы тек 250 адам ғана егілген болатын.
Майгүл СҰЛТАН,
«Егемен Қазақстан»