Мәселен, көпшілік ұқсатқыштығын бірді екеу етуге қабілеттілігін мысал ете беретін Германия экономикасы негізінен шағын және орта кәсіпке негізделген. Оның жақсы жағын Елбасымыз да талай мәрте атап өткен. Әлемдік дағдарыс алып концерндерді, зауыт, фабрикаларды үйдей толқындары бар мұхиттай қақпақылға салғанда, неміс кәсіпкерлеріне оншалықты әсер ете алмаған екен. Өйткені отыз-қырық адам болып жұмыс жасайтын фирма аз шығынмен нарық жағдайына қарай икемделе қояды. Көп жоғалтпайды, пайдалы кәсіпке тез ауысады.
Еліміздегі шағын және орта кәсіп иелеріне де ұқсата білсе, табысқа мелдектеп шыға беруге болатын мүмкіндіктер бар. Қызылорда облысының әкімі Қырымбек Көшербаев «Нұр Отан» партиясы облыстық филиалы кеңесімен келісе отырып, биылғы жылды «Жаппай кәсіпкерлікті дамыту жылы» деп жариялаған болатын. Өйткені облыс аумағында өзін өзі жұмыспен қамтығандар мен мүлде жұмыссыз отбасылар бар.
Қысқа жібі күрмеуге келмей отырған отбасылардың бір реттік мемлекеттік жәрдем бүйірін жаппайды. Оларға тұрақты табыс көзін табу үшін осындай қадамға барған облыс басшысы бұл шешімінің өте өзекті болғандығын іс жүзінде көріп отыр. Қазірдің өзінде шағын және орта кәсіппен бел шешіп айналысып кеткен ағайынның алды «сен же, мен же» табысқа шыға бастаған. Алайда, басталған іске тоқмейілсу түпкі нәтижеге жеткізе бермейді.
Қызылордадағы «Кәсіпкерлік үйінде» өткен жиында бүгінге дейінгі жасалған жұмыстар таразыланып, алдағы жүзеге асатын бағдарламалар пысықталған. Елбасы бастамасын жүзеге асыру үшін облыс әкімі халықпен кеңесіп отырып, жаппай кәсіпкерлікті дамытуды бір жылдан үш жылға ұзартты. Енді ол 2018-2020 жылдар аралығын қамтиды.
– Биылғы жылы облыста жұмыс істеп тұрған кәсіпкерлік субъектілері 11%-ке көбейіп, аталған көрсеткіш бойынша Қызылорда облысы аймақтар арасында көш бастап тұр, – деді жиында «Нұр Отан» партиясы облыстық филиалы төрағасының бірінші орынбасары Ибадулла Құттықожаев.
Кеңесте облыстық кәсіпкерлер палатасының директоры Ғалымбек Жақсылықов баяндама жасап, күн тәртібіне сәйкес атқарылған жұмыстар мен алдағы жоспарларды айтты. Ол облыста осы мақсатқа барлық көздерден 32 млрд теңге қаржы қарастырылғанын, жаппай кәсіпкерлікті дамыту жөніндегі Жол картасы әзірленгенін тағы да еске салды. Онда кәсіпкерлерге қолдау көрсету мақсатында үлгілі бизнес-жоспарлар, нақты алгоритмдер мен 264 елді мекеннің әрбіріне жауапты лауазымды адамдар бекітілген.
Жұмыссыздардың, жастардың, ерекше қажеттіліктері бар азаматтардың жаңа бизнес-идеяларын іске асыруға «Бизнестің жол картасы-2020» бағдарламасы шеңберінде жалпы сомасы 200 млн теңгені құрайтын 224 мемлекеттік грант бөлінген. Облыстық кәсіпкерлер палатасының директоры мемлекеттік гранттар санын арттыру, тұрақты жұмыс орындарын ашу бағытындағы жоспарларымен бөлісті.
– Қазір «Еңбек» нәтижелі жұмыспен қамтуды және жаппай кәсіпкерлікті дамыту бағдарламасы шеңберінде жалпы сомасы 97,4 млн теңгені құрайтын 405 мемлекеттік грант беру бойынша жұмыстар жүргізілуде. Өтеусіз грант есебінен жыл соңына дейін 1005 тұрақты жұмыс орнын ашу жоспарда бар. Сонымен қатар жыл соңына дейін шағын және орта кәсіпкерлік саласында жұмыс істейтін азаматтардың санын кемінде 90 мың адамға жеткізу жоспарланып отыр. Біз бұл межеге жететін боламыз, – деді Ғ.Жақсылықов.
Коалиция отырысында облыстық кәсіпкерлік және туризм басқармасы мен облыстық жұмыспен қамтуды үйлестіру және әлеуметтік бағдарламалар басқармасы басшыларының күн тәртібіне сәйкес атқарған жұмыстарының есебі тыңдалып, жұмысты жетілдіруге қатысты ұсыныстар мен пікірлер айтылды.
Мемлекет басшысы «Қазақстан-2050» стратегиясында кәсіпкерлікті ұлттық экономиканың жетекші күші ретінде бағалап, шағын және орта бизнестің экономикадағы үлесі 2030 жылға қарай, ең аз дегенде, екі есе өсуге тиістігін атап өткен болатын.
Кәсіпкерлікті күшейтудің маңыздылығын Елбасы өзінің дәстүрлі Жолдаулары мен Үндеулерінен және барлық бағдарламаларынан тыс қалдырмай келеді. Биылғы бес әлеуметтік бастамасының бір бағытын «Шағын несие беруді көбейтуге» арнауының өзі-өзін өзі еңбекпен қамтыған және жұмыссыз жүрген халық арасында жаппай кәсіпкерлікті дамыту үшін жасалып отырған үлкен мүмкіндік.
Облыста Мемлекет басшысының тапсырмаларын орындау, жоғарыда айтылғандай, жақсы нәтижесін беріп жатыр.
Бақтияр ТАЙЖАН,
«Егемен Қазақстан»
Қызылорда облысы