Ол Қостанай облысы Жангелдин ауданының Торғай кентінде туған. Ыбырай Алтынсарин негізін қалап кеткен мектепте оқып жүрген кезінде 1941 жылы Ұлы Отан соғысы басталып кетеді де, 13 жасар бала аудандық мекемелердің бірінде кеңсе қызметін атқарады. Жастайынан халықтың қайғы-қасіреттен тұншығып, зар-запыран жұтқанын бірге көрген жасөспірімнің жадағай көңіліне тірек іздеген ой-сезімдері өсе келе трансформацияланып, заман, қоғам, адам арасындағы байланыс пен қайшылықтарға деген өз көзқарасын қалыптастыра бастайды. Социалистік революция, «ақ пен қара, бай-құлақ» деп жұртты қыру, коллективтендіру, 1931 жылғы ашаршылықтан қырылған жұрттың 1937 жылы бас көтерген зиялыларын қуғын-сүргінге ұшыратып көзін жою, 1941-1945 жылдардағы Ұлы Отан соғысы – осындай сұрапыл кезеңдерді бастан өткізген халқымыздың бойындағы өмірсүйгіштік пен қайсарлық, мейірім, сенім, төзім, рухтылықты көрген Ғафу ақынның жанынан алаулаған жырлар төгілді.
Ғафу ағамыздың құдай қосқан жары Бәтеш Хамзақызы да сол 1937 жылғы қуғын-сүргінде ұсталып кеткен әкесінен бір хабар ала алмады. Ақын «Көкиық» атты балладасында сол кездегі үкіметтің сұмпайы, сұрқия саясаты қаншама көзі ашық зиялыларды құртып, халықтың тамырына балта шапқанына ашынған Бәдештің монологінде:
Жалғыз сөз: «жабылдыңыз» бар айтқаны,
Әкетті, алды-артына қаратпады.
Айыбы, кейін білдік, Сәкен ақын
Сөздерін жұртқа оқып таратқаны, – деп күңіренеді.
Ғафу ақынның да еліміз тәуелсіздік алғаннан кейін тынысы ашыла түскені, оның тарихымыздың шырқыраған шындықтарын айқындап, халқымыздың рухани қуатына айналған тұлғалар жайлы жазылған шығармаларында ерекше көркемдік пафоспен көрініс тапқан. Еліміздің басынан өткізген небір нәубет кезінде өздерінің батылдығы мен парасат-пайымымен бас-көз, пана бола білген, халықтың біртуар батыр ұлдарының азаттық жолындағы жанкештілігі мен өр намысын асқақтатқан ақынның поэмалары рухтандырады да еңселендіреді.
Ақырып ата аруағын шақырғанда,
Шаңқ етіп шартарапқа шарқ ұрғанда,
Шашақта шұбар ала ту желбіреп,
Самсаған шығарғанда батырды алға.
Қашанда қасиеттеп қазақ тұтқан,
Артық жоқ дүниеде азаттықтан,
Сол үшін, соны қолдан
бермеймін деп,
Тарихта талай ерлер басын жұтқан.
Дегендер тұтас туған тұлға бүтін,
Киместен өткен жандар құл қамытын,
Қашанда азаттықтың бір перзенті,
Бойында жатар тулап бұл халықтың, – деп арқалана тебіренеді ақын өзінің «Азаттық перзенттері» атты поэмасында. «Азаттықтың алғашқы ұлдары» деп аталған бірінші бөлімнен бастап жоңғар шапқыншылығы, Кенесары хан көтерілісі, Исатай-Махамбет, Амангелді батырлар ұлт-азаттық күресі мен Ұлы Отан соғысындағы қазақ батыры Бауыржан Момышұлымен бірге қазақ солдаттарының да көрсеткен ерлігі мен өрлігінің арқасында келген Жеңістегі біздің халқымыздың қаһарман келбетін салиқалы да зор сүйіспеншілікпен суреттеген Ғафу ақын данагөй батыр Бауыржанның атынан:
Әрине, сұрапылда жеңдік – дейсің,
Жеңгізген Елдік дейсің,
Ерлік дейсің,
Тағы да одан басқа бір күш барын
Мен айтсам еш суреттеп сен
бітпейсің.
Қазақтың Азат деген өз атасы,
Болсын деп, Азаматтың азатбасы,
Соны іздеп кең даланы
шарлаған ол,
Көшумен көктем айы,
жаз аптасы.
Қашанда азат кісі намысты адам, – деп кемел оймен түйіндейді.
Ғафу ақынның поэзиясының қуаты оның жан дүниесінің періштедей тазалығында, елімен өзінің тағдырының егіз екеніне, өмірдің ұлылығына, Жаратушының қағидаларына деген берік сенім мен адалдықта. Мұндай рухани байлық шығарманың көркемдік тынысы болып табылады. «Ақын елінің тілі ғой, бүлк-бүлк еткен жаны ғой», деп 1937 жылғы репрессияның құрбаны болған қазақтың ардақты ұлы Жүсіпбек Аймауытов айтқандай, егер ақынның тілі мен жан байлығы құнарлы болмаса, оның шығармалары жүрекке жетпейтіні белгілі. Сондықтан тек үлкен дарын иесі ғана өз көңіл көрегендігімен, терең сезімталдығымен жеке адамның ғана емес, бүкіл қоғам мен заманның тынысын сезіп, күретамырын дөп басып шығармаларында көркем де психологиялық шеберлікпен оқырманның жетесіне жеткізе алады. Осы ойымызды Ғафу ағамыздың мына шумағы дәлелдеп тұрғандай:
Бұл қазақта ұғым бар «заржақ» деген,
Бүгін барлық ақындар зарлап өлең
Жазып кетті, қарғайды әлде кімді,
Болмай қойды ашуда «алды-арт» деген.
Кіл жылауық өлеңнен өнер шықпас,
Қанша сыйлап ықылас қойғанменен, – деп толғанған ақын қоғамымыздағы келеңсіз кертартпалықтарға күйінеді.
Елі бардың жаны бай... Ғафу ақынның туған жердің әрбір түкпіріне деген жүрегінен жалындап атқылаған махаббаты тудырған жырлары нұр-шуақтай төгіліп, жарқырайды:
Басында Байынқолдың
Шоған сайы,
Бар ма екен сұлулықтың соған сайы,
Үш қатар кілем іліп тастағандай
Тянь-Шаньның күміс шырша, қарағайы.
Көрсетпес шыңның өзін биіктігі
Аспанға білектерін созған сайын.
Ауаға тояр емес өкпе, шіркін, –
Дегендей,«осы арадан қозғалмайын».
Осылай арқалана жырлаған ақынның көркемдік бейнелеу шеберлігіне тәнті болып, сол сұлулықтан жан дүниеңіз нәрленіп, бойыңызды шаттық билеп, шабыттанасыз. Ал оның «Тобыл толқындары» атты жырларындағы телегей тебіренісімен бірге толқисыз, толғанасыз, туған жердің қымбаттылығы арта түседі:
Рахмет саған, Қостанай,
Рахмет, дария, Тобылым,
Ықыласымды тастамай,
Рахатыңа шомылдым!
Ол көл емес – шынында,
Алғысы туған мекеннің
Байқасам – соң да, бұрын да,
Бақытты ақын екенмін, – дейді ақын зор ықылас, алғыс сезімі бойын кернеп. Ал «Алтай дәптері» атты топтамасында табиғаттың құдіретіне бас иген ақын аға, шеберліктің қасиетін асқақтата түседі:
Сен шеберсің, Табиғат,
Сенде өлмейтін өнер көп.
Айту да бір – ақиқат, –
Шеберлерді шебер деп!
Осылай тамсанған ол, мына ғұмыр дарынды, бойына ерекше қуат, құт дарыған шеберлердің арқасында бой түзеп тұрғанын асқақтата жырлайды.
Әрбір үлкен ақын заманның күрделі кезеңдерінің қайшылықтары мен күреске толы құбылыстарын өз түйсігімен сезініп, көзқарасымен тұжырымдап, оқырманға бағыт-бағ- дар береді. Ал шығармалары санада қопарылыс жасауы үшін ақынның рухани әлемі адамзаттың озық ойымен нәрленіп тұруы керек. Мұндай көктен құйылатын шабытты сәтті ұстап алу қиынның қиыны екенін Ғафу ақын да жақсы біледі, сондықтан ол:
Әрине, табиғатта ұлы күш бар,
Әрекет, әлемдегі құбылыстар.
Ой болса әкетеді нелер саққа,
Көз болса, мыңнан соның бірін
ұстар,– деп тебіренеді.
Әрбір қазақтың санасына, жүрегіне елдіктің, ерліктің, ұлтымыздың рухани құндылықтарын, тәуелсіз ел болуымыз үшін басын тіккен тұлғаларымыз жайлы толағай толғаныспен, терең де ұшқыр сезімталдықпен жырлаған қазақтың ірі ақыны Ғафу Қайырбеков халқымыз тәуелсіздікке қолы жеткенде қанатын кең жайып, шабыты шарықтай түседі. Егемендігіміздің қадір-қасиетін ол өзінің демі біткенше жүрекжарды жырларымен айғақтап, айшықтаған екен. «Азаттықтың алғашқы ұлдары» атты жыр топтамасында ақын аға:
«Қашан сен ел болып едің», – деген сұрақ,
Тиеді атқан оқтан ауырырақ.
Кеудеңде намыс деген бір от болса,
Лап етіп сыртқа шығар сонда бір-ақ.
Ел мен Ер біздің тілде екі-ақ әріп,
Көрген жоқ бірін айтсаң, бірі қалып,
Көнсадақ, көзсіз батыр шығар қырға
Күн туса ел басына, бұлт айналып, – деп ақын әрбір қазақтың көкірегін оятып, рух шақыра сілкіндіреді. Бастарын ел үшін тіккен ата-бабаларымыздың рухын түсіріп алсақ, өзімшілдікке бой алдырсақ, соңы немен тынатынын ескерткен абыз ақын дауысы өктем шығады:
Ал содан кейін алмасар,
(Нанбасаң барлап білші өзің),
«Өзім» деген бір сезім,
«Елім» деген бір сезім.
Алмаспай қалар кезі бар,
Алланың ол да салғаны,
Көбейді бұл шақ сондайлар,
Оп-оңай оны байқайсың.
Еріңді іздеп елді ойлар
Жақыннан, жаттан таппайсың.
Жүйріктің бағын топ сынар,
Алғашқы аяқ салғаннан.
Жалғанда сорлы жоқ шығар,
Көп болып, жалғыз қалғаннан! – деп ол алауыздықтан, барымыздан айырылып қалудан сақтандырады.
Аяулы да арда қазақтың ірі ақыны Ғафу Қайырбековтің поэтикалық ой керуеніндегі ұлттың сенімі мен рухани қуаты, ерлігі мен өрлігінің табиғи болмысы, даналығы мен тереңнен тамыр тартқан дүниетанымы, дарқан дарындылығы, моральдық, эстетикалық алтын жыр құймаларына айналып,болашаққа жол тартып, халқымыздың жан дүниесін байыта берері хақ!
Жадыра ДӘРІБАЕВА,
ақын, Қазақстанның еңбек сіңірген қайраткері,
Халықаралық «Алаш» әдеби сыйлығының иегері