Әдебиет • 05 Қазан, 2018

«Тарихқа толы Тарбағатай» альманахының таныстырылымы өтті

799 рет
көрсетілді
3 мин
оқу үшін

Тарбағатай өлкесін сөз еткенде тамыры сонау сақ дәуірлеріне қарай тереңдей түсетін ғасырлар күмбірі құлаққа жеткендей болады.

«Тарихқа толы Тарбағатай» альманахының таныстырылымы өтті

Өңірдің тарихи келбеті Шығыс Қазақстан жерінде жүргізілген археологиялық қазба жұмыстарының нәтижесінде табылған жәдігерлердің маңыздылығынан-ақ айшықталып тұрғандай. Алматыдағы Ұлттық кітапханада өткен кездесуде елімізге белгілі қаламгерлер, бизнес және БАҚ өкілдері «Тарихқа толы Тарбағатай» альманахының таныстырылымын өткізіп,  ғажайып өлкенің тың деректеріне қанықты.

Кітапты археолог Ерден Оралбай құрастырып, жинақтаса, көркемдеп, ерекше дизайнмен жарыққа шығарып, қолдау көрсетуде «Асыл тас» компаниясының директоры Дулат Тастекеевтің еңбегі зор. Биылғы жылы 3-ші басылымы жарыққа шығып отырған кітап жеті бөліммен толықтырылған екен. «Алтайдан Арқаға дейін...» бөліміне көне заман ескерткіштері, археологиялық зерттеулер барысы, ғалымдардың зерттеу мақалалары, саяхатшылардың естеліктері  енсе, «Ерлікке толы сол заман» бөлімінде қазақ халқының басқыншыларға қарсы ерлікке толы күресі, Шыңғыстау мен Қалбаға, Алтай мен Тарбағатайға қайта қоныстануы, Абылайхан бастаған батырлар жорығы, билер мен қаһармандар туралы мәліметтер келтірілген.  Осылайша өңір тарихын айшықтайтын «Халқымның қилы тағдыры», «Ел іші – өнер кеніші», «Қуатты шаруашылық, бұлжымас заң – ел дамуының негізі», т.б. бөлімдер бүгінде осы өңірдің дамуына үлес қосқан азаматтардың ерен ерліктеріне арналады.

Шараны  жүргізген Дүниежүзі «Қазақ күресі» федерациясы атқару комитетінің төрағасы Талғат Мәзібаев Тарбағатай өлкесіне қатысты көптеген тарихи деректерді мысалға ала отырып, қатысушылар пікіріне сөз кезегін ұсынып отырды.

Альманах ҚР Мемлекеттік сыйлығының иегері Досхан Жолжақсыновтың алғы сөзімен басталыпты. Ал осы игі іске қолдаушы болып жүрген Дулат Тастекеев  «Байтақ еліміздің әр түпкірі жайлы қазбалап зерттейін болсақ, әлі талай кітап жазуға болады. Біздің арманымыз -  осы жобаның үлгісімен әрбір өлкенің белсенді азаматтары туған өңірі жайлы қызықты жазбалалар беретін парақша ашса, сөйтіп Қазақстанның бүкіл аумағында өлкетану ғылымын жандандырып, экотуризмді дамытса... Туған өлке жайлы жастарға білім беретін, насихаттайтын, сол арқылы отанына деген сүйіспеншілігін арттырып, ел тарихына деген құрметін асқақтататын осындай әлеуметтік жобалар көбейе берсін» деген пікірін білдірді.

Игі жобаны жүзеге асырған азаматтарға алғысын білдірген Қазақстанның Еңбек сіңірген қайраткері Жүрсін Ерман, ҚР Ұлттық Кітап палатасының директоры, жазушы Әлібек Асқаров, Қазақстан Жазушылар одағы  төрағасының орынбасары Бауыржан Жақып, кәсіпқой боксшы Қанат Ислам, т.б. Тарбағатай өлкесі құнды жәдігерлерімен ғана емес, елі мен жерінің келешегі үшін еңбек етіп жүрген дара тұлғаларымен де ерекшеленетіндігіне тоқталып, киелі өлке көркейе берсін деген тілектерімен бөлісті.

Эльвира СЕРІКҚЫЗЫ,

«Егемен Қазақстан»

АЛМАТЫ