Кеше Елбасы Қазақстан халқына Жолдауында мемлекеттің беделі ішкі жалпы өнімнен, экономикалық қуаттан, сапалы тұрмыстан көріну керек деді. Бүгінге дейін әр салада қордаланған мәселелерді жан-жақты айтып, олардың әрқайсысының шешу жолдарын да көрсетті. Тиімді жұмыс істеудің тетіктерін бүге-шігесіне дейін талқылап, тоқталып айтып беруі меніңше, үкіметтің, әкімдіктердің, құқық қорғау органдарының жұмыстарын одан әрі жетілдіре түседі.
Сапалы білім берудің алғашқы қадамы балабақшадан басталу керектігін айтқан Елбасының сөзінде үлкен мақсат-мұраттар бар. Білім мен ғылымға бөлінетін ақша ішкі жалпы өнімнің он процентіне дейін өсіруді тапсыру болашақ ғылымда екенін көрсетіп берді.
Сонымен қатар келесі жылды «Жастар жылы» деп жариялауы Жолдаудағы бастамалармен тікелей байланысты. Жолдауда айтылған мәселелер толығымен шешіліп, жүзеге асса, ол мемлекет үшін үлкен табыс болады. Келесі жылы жастарға байланысты шаралар тек бір рет қана өтіп, ұмыт болатын жиындар емес, кешенді жобалар болуы керек. Елбасы өзі ұсынған жаңа гуманитарлық бағыт сияқты ұзақ мерзімді жобалар жалғасын тапса деп ойлаймын. Бұл жастардың біліктілігін арттыруда ерекше пайдалы болар еді. Білім-ғылымға қызығушылығы үлкен жастарды қолдау қазір маңызды. Өйткені медицина, экономика, руханият, техника салаларының басты жетістіктерін ғалымдар жасайды. Ал халық соны пайдаланады. Сондықтан келер жылы жастарға арналған жемісті жобалар басталады деген ниеттемін.
Рауан КЕНЖЕХАНҰЛЫ,
«Ұлттық аударма бюросы қоғамдық қорының» атқарушы директоры