Суретшінің саяжайында соңғы кездері салған бірнеше картиналары тұр екен. Солардың бірі көзіме оттай басылды. Иә, иә… Бұл өте таныс көрініс қой. Оңтүстікке қарай сапар шегіп бара жатқанда талай рет тамашалағанмын.
Бір басталса, бір ай бойы толастамайтын Қордайдың желі соқса шыркөбелек айналатын алып электр генераторлары – біздің елімізге ХХІ ғасырда келген ірі жаңалықтардың бірі. Олар қазір біраз өңірлерге электр қуатын береді. Ұзақтан қарасаң, кәдімгі әлем әдебиетінен жақсы таныс әпенді кейіпкер Дон Кихот мырза шайқасатын сол баяғы жел диірмендерге ұқсайды.
Бірақ оларға әлі күнге дейін қазақша бір ат тауып қоя алмай келе жатқанымыз анық. Осыған байланысты менің есіме бір қызық оқиға оралады.
...1998 жылдың көктемінде Шымкент қаласына қырғыз әдебиетінің классигі, есімі әлемге әйгілі жазушы Шыңғыс Айтматов келді. Ол кезде оңтүстікте электр қуаты өте тапшы еді. Жарық бір сөніп, бір жанып тұратын. Сондықтан да қол шамның жарығымен өткен әңгіме үстінде ұлы жазушы Еуропада жел қуаты арқылы электр энергиясын тарататын генераторлардың көп екендігін айта отырып: «Құдай қаласа, ондай аппараттар біздің жаққа да жетіп қалар. Сондықтан оларды қазақша қалай атау керек екенін сіздер, қаламгер бауырлар, осы бастан ойластыра бергендеріңіз абзал», деген-ді жымиып.
Бұл сөзді, біз әрине, жадымызда сақтап қалдық. Кейін, расында да, Қордай асуына әлгіндей алып генераторлардың бір емес, бірнешеуі орнатылған кезде оларды қалай атайтынымызды білмей іштей қысылғанымыз да рас.
Ал өткен жылы… жо-жоқ, алдыңғы жылы екен-ау, Атырауға іссапармен бара қалғанымызда сол генераторларды орнатуға қатысқан бір топ білікті мамандармен жолығып, әңгімелесудің сәті түсе кеткені. Сонда олар: «Әй, бауырларым-ай, сендер біздің қаңғалақтарға қазақша ат таба алмай қиналып жүр екенсіңдер-ау!» деп әзілдеп еді.
Сол сәтте, шынымды айтсам, жел екпінін электр қуатына айналдыратын алып генераторларды тап осылайша қызық та қарапайым тілмен «Қаңғалақ» деп атай салу көңілге қона кеткендей, қуанғанымнан күліп жібергенмін.
Енді міне, Қордайдағы қаңғалақтарды суретшінің картинасынан көріп, қызықтап тұрмын.
Расында да, оларды осылай Қаңғалақ деп атасақ қалай болар екен, ә?!.
Нұрғали ОРАЗ,
«Егемен Қазақстан»