Мұғалімнің абырой беделінің төмендеп бара жатқаны жөніндегі жанайқайымыздың осындай нәтиже бергеніне қалайша қуанбаймыз?! Еліміздегі білім, денсаулық саласының жағдайынан және ондағы өзекті мәселелерден жақсы хабардар Елбасы заң әзірлеу жөнінде тапсырма беріп отыр. Жасыратыны жоқ, соңғы кездері қолға алынып жатқан реформаларды жүзеге асырады деген мұғалімдеріміздің арасында дау-дамаймен басы қатып, сотқа жүгінетіндері көбейе түскен болатын.
Мұғалімдерді балағаттау аздай, таяқ жеп жатқандары жөнінде де ақпарат құралдарында жарияланып жатты. Көше сыпыртатыны, сайлау, санақ деген науқандарға жүгіртетіні де аз айтылған жоқ. Мектеп директоры мен қарапайым мұғалімнің соттасып жатқаны жөнінде көптеген дерек келтіруге болады. Заң қабылданса, мұғалім тек негізгі міндетін атқаратын, басқа жұмысқа алаңдамайтын болады. Бұл орайда айтар ұсыныс-тілектеріміз де жоқ емес. Ең алдымен, аталған заң жобасы БАҚ беттерінде ашық талқыға түскенін, оны дайындауға қатардағы мұғалімдердің тартылғанын қалар едік. Сондай-ақ заңда білім басқармаларын жергілікті әкімшіліктен Білім және ғылым министрлігінің құзыретіне өткізу мәселесі қамтылса деген ұсыныс бар. Бұл – мұғалімдерді өз міндетіне жатпайтын жұмыстардан құтқаратын бірден-бір жол.
Мұғалімге қол жұмсаған адамға қатаң жаза тағайындалуы тиіс. Бюджеттен мектептерді жөндеуге бөлінген қаражат БАҚ бетінде жариялануы қажет. Сонда мұғалімдер мен ата-аналардан мектепті жөндеуге ақша жинауға тоқсауыл қойылады. Міне, осындай мәселелердің заңда қамтылғанын қалаймыз. Жолдауда айтылған бүкіл мектептер мен балабақшаларды бейнебақылау жүйесімен қамтамасыз ету, мектеп психологтерінің жұмысын күшейту де бүгінде өте өзекті. Бұл балалардың қауіпсіздігін қамтамасыз етеді.
Мұғалімдер ғана емес, бүкіл ата-аналар үш ауысымды мектептер мәселесінің шешімін табатынына қуанулы. Бұл орайда Елбасы Жолдауында 2019-2021 жылдары қосымша 50 млрд теңге бөлінетіні айтылды. Яғни, нақты мерзім мен бөлінетін қаражат көлемі аталды. Қарапайым халық Жолдауда жүктелген негізгі міндеттердің мерзімінде орындалатынына сенімді.
Өмір ШЫНЫБЕКҰЛЫ,
№41 мектеп-лицейі тарих пәнінің мұғалімі
ШЫМКЕНТ