Алқалы жиынның негізгі мақсаты – білім беру сапасын арттыру, аккредиттеу және рейтингілік зерттеулерді қамтамасыз ету жүйесін дамыту, халықаралық стандарттар бойынша білім беру, оқу бағдарламалары және білім алушыларды дайындау траекториясы сапасын арттыру, ең үздік практиканы талқылау мақсатында халықаралық үнқатысу алаңын құру.
Жиын барысында Білім және ғылым вице-министрі Асхат Аймағамбетов түлектердің білікті маманға айналуы мемлекет үшін маңызды мәселелердің бірі екенін тілге тиек етіп, бұл орайда елімізде атқарылып жатқан жұмыстарға тоқталып өтті.
«Елбасы жаңа Жолдауында жоғары оқу орындарының сапасын көтеру бойынша алдымызға үлкен міндет қойып, бірнеше тапсырма берген болатын. Осы бағытта Білім және ғылым министрлігі тиісті жұмыс атқарып жатыр. Бүгінгі таңда Еуропадан, Қырғызстаннан, Франциядан, басқа да мемлекеттерден сарапшыларды жинап, осы мәселені талқылау үстіндеміз. Өйткені жоғары білімнің сапасын көтеру мәселесі өте өзекті тақырыптардың бірі. Қазірдің өзінде бірнеше нормативтік құқықтық құжаттарға министрлік тиісті өзгерістер енгізіп жатыр. Ең басты мәселенің бірі – түлектерді жұмысқа тұрғызу жайы. Біздің ойымызша, ЖОО-ның сапалы білім беріп жатқандығының бірден-бір белгісі жұмысқа тұрғызу көрсеткіші деп айтуға болады. Егер ЖОО жақсы маман дайындап жатса, әрине онда нарық түлектерді жұмысқа қабылдайтын болады», деді А.Аймағамбетов.
«Статистика бойынша жоғары оқу орнын бітірген түлектердің бір жылда қаншасы жұмысқа тұрады» деген журналистің қойған сұрағына вице-министр ең бастысы – мемлекеттік зейнетақы қорының көрсеткіші екенін айтты. «Бұл – ресми көрсеткіш. Егер түлектеріміз жұмысқа орналасатын болса, онда зейнетақы қорына төленетін қаржының көрсеткіштері болу керек. Сол көрсеткіштерге байланысты бітіруші түлектердің жұмысқа орналасу мәселесі қаншалықты шешімін тауып жатқанын байқай аламыз. Студенттердің жұмысқа орналасуы жөнінде мәліметті ЖОО-дан сұрайтын болсақ, олар түрлі анықтамаларды жинап алып, бізге бір мәлімет беруі мүмкін. Сондықтан, біз үшін ең бірінші жоғары оқу орындарының өздерінің ақпараты емес, ресми мәлімет, яғни зейнетақы қорына төлеп отырған көрсеткіштер маңызды. Егер түлек жұмысқа орналасса, оның жалақысының 10 пайызы зейнетақы қорына аударылады. Сондықтан осы көрсеткіштер арқылы шынайы ақпаратқа қол жеткізе аламыз», деді ол.
Форум жұмысына Мәжіліс депутаттары, Қырғызстан, Тәжікстан, Өзбекстан, Ресейдің Білім және ғылым министрліктерінің өкілдері, жоғары білім беру сапасын қамтамасыз ету халықаралық еуропалық желілері, шетелдік акредиттеу органдарының өкілдері қатысты.
Рауан ҚАЙДАР,
«Егемен Қазақстан»