Бұл жарысқа төрт команда бірден жолдама алып отыр. Олар – Азияның клубтық чемпионатының жеңімпазы «Суприм» (Таиланд), Чемпиондар лигасының жеңімпазы «Вакыфбанк» (Түркия), Оңтүстік Американың үздігі «Минас» (Бразилия) және алаң иелері ретінде «Жежиянг» (Қытай). Ал Қазақстанның «Алтай», Түркияның «Экзачибаши Витра», Францияның «Волеро Ле Канн» және Бразилияның «Прайя» командалары «wildcard» арнайы шақырту қағазына ие болды.
Әлемнің клубтық чемпионаты 1991 жылдан бері ұйымдастырылып келеді. Осы уақытқа дейін 11 мәрте жалауы желбіреген жарыста Түркияның командалары бес мәрте топ жарған екен. Үш рет бразилиялық арулардың бағы жанса, Италия, Әзірбайжан және Ресейдің волейболшылары бір-бір реттен дара шықты. Ал былтыр Жапонияның Кобе қаласында ұйымдастырылған додада Ыстамбұлдың «Вакыфбанкы» жеңімпаз атанса, Рио де Жанейроның «Рексона-Сеск» және Цюрихтың «Валеро» клубтары жүлдегерлер қатарынан көрінді.
Ғалым СҮЛЕЙМЕН,
«Егемен Қазақстан»
