Орайы келгенде айта кетейік «All About Photo» қоры – пайдасы мол және өте кең фото мәліметтер базасы жинақталған құрылым. Ресурстың басты мақсаты – әлем фотографтарының жұмысын жүйелеп отыру. Алғаш рет 2013 жылдың ақпан айында АҚШ-тың Калифорния штаты, Сан-Франциско қаласында іске қосылған екен. Азғана уақыт ішінде фотоқор жасаудан әлемге танылған. Бұл жерден кез келген тақырып бойынша қажет фотосуретті тауып алуға болады. Мұнда арнайы онлайн-журнал шығады, сонымен қатар веб-сайты және фотолабораториясы, студиясы, оқу шеберханасы, музей, галерея, көрме залы бар.
Ал мына үздік фотоның авторы – ұлыбританиялық фотограф Тарик Зайди. Сурет жуықта Бай-өлке аймағының Сақсай сұмын жері «Бітеу» дейтін күзеулікте түсірілген екен. Атқа мініп, алдына немересін мінгестіріп, балдағына құс қондырған ақсақалдың аты – Бәйтен Бабиұлы. Бәкең туралы «Егемен Қазақстан» газетінің 23 тамыз күнгі №159 санында «Этнографиялық әңгіме» айдарымен «Қыран ұстау қазақтың ен-таңбасы» атты көлемді сұхбат жарияланған-тын. Осы сұхбатта жасы 85-тен асқан ақсақал қолына құс қондырып, бүркітшілікпен айналысқанына 60 жыл болғанын айтып, мына бір қанатымен желкесін көмкеріп тұрған бүркітін 33-ші құсым деген еді... Енді міне қазақтың этнотұрмысын бұзбай сақтап отырған қарияның ісі шетелдіктер тарапынан үздік деген атқа ие болып отыр.
Бекен ҚАЙРАТҰЛЫ,
«Егемен Қазақстан»
