Аймақтар • 07 Наурыз, 2019

Ө.Шөкеев: Барлық деңгейдегі әкімдер көпбалалы отбасылардың жағдайын білуі керек

945 рет
көрсетілді
1 мин
оқу үшін

Түркістан облысының әкімі Өмірзақ Шөкеев Халықаралық әйелдер күні мерекесі қарсаңында Ордабасы ауданындағы алтын құрсақты аналарды үйлеріне барып құттықтады.

Ө.Шөкеев: Барлық деңгейдегі әкімдер көпбалалы отбасылардың жағдайын білуі керек

Көпбалалы аналардың бірі - Назира Алиева Қажымұқан ауыл округі, Темірлан ауылының тұрғыны. Отбасында 1 ұл, 5 қыз тәрбиелеп отыр. Айгүл Аязбаева да осы ауданның тұрғыны. «Күміс алқа» иегері. Жеке кәсіпкер. Кездесуде өңір басшысы әулеттің берекесі мен ұйытқысына айналып отырған аяулы жандарды келе жатқан мерекемен құттықтады. «Көктеммен бірге жеткен төл мерекелеріңіз құтты болсын! Меніңше, барлық деңгейдегі әкімдер көпбалалы отбасылардың жағдайымен танысуы керек. Олармен бетпе-бет жүздесіп, қандай көмек қажет екенін білген жөн деп ойлаймын. Сіздердей жандарға мемлекет тарапынан, қашанда тиісті қолдаулар болады. Жақында Елбасы Н.Назарбаев «Нұр Отан» партиясының съезінде де көпбалалы отбасылардың тұрмыстық жағдайын жақсарту жөнінде Үкімет пен әкімдерге нақты тапсырмалар берген болатын. Аз қамтамасыз етілген, әсіресе көпбалалы отбасыларды қолдаудың шарттары жеңілдетіліп, әр балаға 21 мың теңге көлемінде жәрдемақы беріледі. Сіздер секілді батыр аналарымыз көп болсын! Жас қыз-келіншектер өздеріңізден үлгі алуы тиіс. Отбасыларыңызда балалардың саны көбейе берсін!», – деді облыс басшысы. Сондай-ақ, облыс әкімі аналарға мерекелік сыйлығын табыс етті.

Облыс әкімінің арнайы құттықтап келгеніне ризашылығын білдірген аналар Түркістанды өркендету бағытындағы бастамаларына сәттілік тіледі.

Ғалымжан ЕЛШІБАЙ,

«Egemen Qazaqstan»

Түркістан облысы