2026 жылдың қаңтар − мамыр айлары аралығында Қазақстан бойынша ақылы қызметтердің бағасы орта есеппен 10 пайызға өсті. Бұл ретте Астана қызмет көрсету саласындағы инфляция деңгейі ең төмен өңір ретінде тіркелді, деп хабарлайды Egemen.kz.
Статистикалық мәліметтерге сәйкес, елордада қызметтер құны 7,5 пайызға қымбаттаған. Алматыда бұл көрсеткіш 9,2 пайызды, ал Шымкентте 9,5 пайызды құрады.
Қызмет көрсету бағасының ең жоғары 15,9 пайыз өсім Солтүстік Қазақстан облысында байқалды. Одан кейін Атырау облысы (14,9%) мен Түркістан облысы (13,1% пайыз) тұр. Алматы (12,4%) мен Павлодар облыстары да (12%) осы қатардан табылып отыр.
Ал ең төмен өсім байқалған өңірлер қатарында Астана (7,5%), Маңғыстау облысы (8,3%), Ақмола облысы (8,5%), Шығыс Қазақстан облысы (9%) мен Алматы қаласы 9,2% бар.
Инфляция баяулады: Қазақстанда өткен жылмен салыстырғанда не арзандады?
Сарапшылардың айтуынша, қызмет көрсету саласындағы баға өзгерісі өңірлердің экономикалық ерекшеліктеріне, еңбек нарығына, халық табысы мен бәсекелестік деңгейіне тікелей байланысты. Сондықтан әр аймақтағы инфляция қарқыны әртүрлі қалыптасады.
Еске сала кетейік, бұған дейін Ұлттық экономикалық зерттеулер бюросы 2026 жылдың желтоқсанына қарай жылдық инфляция 10,4%-ға дейін төмендеуі мүмкін екендігін мәлімдеген болатын.