Ақкөл ауданындағы Өрнек ауылының 9-сынып оқушысы Алмира Каукенова Алматы қаласында өткен республикалық «Ғұмырдария» телефестивалінде жас әншілер арасында бірінші орынды иемденді.
Аудандық білім бөлімінің әдіскері Ханша Ақтышқанқызының айтуынша, аталған өнер додасына еліміздің барлық өңірінен және Қытайдан 1000-ға тарта балауса өнерпаз қатысқан. Ақмола облысының намысын қорғау құрметі ауыл мектебінің оқушысы А.Каукеноваға бұйырған.
Телевизиялық түсірілімдер «Алматы» және «СТВ» арналары арқылы, бірнеше кезеңде жүргізілді. Алмира ақтық байқауда «Эстрадалық шеберлік» аталымында өнер көрсетіп, «Ана жүрегі» әнін тамылжыта шырқады. Беделді қазылар алқасы ақмолалық жас талантты үздік деп таныды.
– Бұл менің үлкен сахнада үшінші рет өнер көрсетуім, – дейді Алмира қуанышына құтты болсын айтқанымызда. – Алдыңғы жылы ақиық ақын Мұқағали Мақатаевты еске алуға арналған «Жырлайды жүрек» республикалық байқауында жүлделі үшінші орын алып, лауреат атандым. Одан кейін Астанада ән салдым. Былтыр халықаралық «Ғұмырдария» ән байқауына шақыру алдым. Қатты толқыдым. Өйткені, оған қатысқан құрбыларымның барлығы керемет өнерпаздар еді. Жолым болып, жеңімпаз атанғаныма, алтын медальға ие болғаныма қатты қуандым.
Енді Алмира Каукенова ел таныған жобаның кезекті теледидарлық бағдарламаларына қатысатын болады.
Бақберген АМАЛБЕК,
«Егемен Қазақстан».
Ақмола облысы,
Ақкөл ауданы.