Айталық, Қарағанды қалалық №4 емханасында жағымды жаңалықтар, өнімді өзгерiстер жетерлік. Мәселен, электронды қызметті дамыту – әлемдегі медициналық қызмет көрсетудің жаңа деңгейі. «Денсаулық» мемлекеттік бағдарламасына сәйкес, еліміздің медициналық қызмет көрсету саласына инновациялар енгізу заман талабына сай жаңа кезеңге көтеріліп келеді.
Осыған байланысты былтыр Қарағанды өңірінде «Виенна» ЖШС компаниясы мен облыстық денсаулық сақтау басқармасы «SOS қызметімен дистанциялы босануға дейінгі патронаж» бірлескен жобасын іске қосқан болатын. Аталған жобамен алғаш тәжірибе жүргізген мамандардың бірі, Қарағанды қаласының №4 емханасы директорының ана мен бала денсаулығын бақылау бойынша орынбасары Жанар Башекова жайлы әңгімелемекпіз.
Жанар Мұхамедкәрімқызы – науқастарды емдеуде кәнігі маман және бай тәжірибесін жас мамандармен бөлісе білетін бірегей басшы. Жұмысы тікелей аналар мен балаларға қатысты дәрігер «Денсаулық» бағдарламасының талаптарына толық жауап беретін және жүктілік кезіндегі ана мен бала өліміне тосқауыл боларлық аса қажетті медициналық көмектің түрін алғаш пайдалануда біршама игілікті істер атқарып отыр. 1998 жылы Қарағанды мемлекеттік медицина университетінің педиатрия факультетін үздік бітірген Жанар Башекова 2015 жылдан бері №4 қалалық емханада еңбек етіп келеді.
Әйелдердің жүктілік кезеңіндегі дайындығы мен олардың денсаулығына жауаптылықпен қарау – Башекованың басты міндеті.
«Біздің емханада 64792 адам тіркелген болса, оның 34105-і әйелдер. Бүгінде бұл қосымшаны 700-ден астам жүкті ана пайдаланып отыр. Сәйкесінше, Қарағандыда нәрестелер мен аналардың өлім-жітім санын «SOS қызметімен дистанциялы босануға дейінгі патронаж» қызметімен бірнеше есе төмендеттік. Ол көрсеткіштерді жүктілік кезінде де, бала туғаннан кейін де 42 күн бойы жақсартуға бағытталған. Бағдарламаны кез келген аяғы ауыр ана ұялы телефонына тегін жүктей алады. Онда профилактикалық шараларға байланысты толық ақпарат, пациент пен дәрігердің ынтымақтастығын жақсарту, жедел жәрдем қызметінің сапасын арттыру көзделген», дейді ол.
Бүгінгі таңда жүкті әйелдің жағдайын бақылау, нақты тұрғылықты жерін білу, жедел көмек көрсету смартфон немесе планшетке мобильді қосымша орнату арқылы жүзеге асырыла бастады. Қосымшада дәрігерге арналған виртуалды жұмыс кабинеті жасақталған. Онда дәрігер қаралушының барлық деректерін толық көре алады.
Жалпы, облыстық денсаулық сақтау басқармасының деректеріне сүйенсек, жыл сайын өңірде 22 мың 500 бала дүниеге келеді. Нәресте өлімі 6,9 пайызға төмендеген.
Міне, Жанар Мұхамедкәрімқызындай жандарды біз дәрігерлердің ішіндегі дәнекер маман деуімізге болады. Себебі, олар ана мен баланың арасындағы жағдайды тұрақты бақылау, емделуші мен ақ халатты абзал жандардың арасындағы жұмысты жақсарту жағына үнемі көңіл бөліп отыратын талапшыл әрі табанды жұмыс атқаратын қызметкерлер. Мысалы, былтыр созылмалы жүрек ақауына ұшырап, бала табуына тыйым салынған ананың жүктілік кезеңін толық қадағалап, аман-есен ұл бала дүниеге келіп, жас нәресте мен тәуекелшіл анаға жарық сәулені қатар сыйлай білді.
Мирас АСАН,
«Егемен Қазақстан»
Қарағанды облысы
