Аймақта 48 мектеп пен 44 балабақша жұмыс істейді, олардың басым көпшілігі қазақ тіліндегі мектептер мен балабақшалар. Баян-Өлгей туралы бекерге сөз қозғап отырған жоқпыз. Жақында Өскеменге осы аймақтың әкімі Ғылымхан Айып бастаған делегация арнайы келіп қайтты. Алтайдың ар жағынан келген ағайындарымыз Шығыс Қазақстанмен қарым-қатынас, алыс-беріс көкжиегін нығайту мақсатында келгендерін айтады. Ғылымхан Айып облыс әкімі Даниал Ахметовпен кездесуінде Өскемен мен Баян-Өлгейді бауырлас аймақ етіп бекітіп, бірлесе жұмыс істеу жөнінде ұсыныс білдіріп, Шығыс Қазақстан мен Моңғолия арасын жалғайтын төте жол ашылса деген тілегін жеткізді. «Бұл мәселе ұзақ жылдар бойы көтеріліп, мінберлерден талай айтылып келе жатқанымен, әзірге нәтиже жоқ. Егер ол жол ашылатын болса, екі аймақтың арасы айтарлықтай қысқарып, сауда-саттық та жандана түсетін еді», деген Ғ.Айып биыл егін шығымының нашарлығына байланысты ұннан қысылып отырғандарын тілге тиек етіп, Баян-Өлгейдегі қазақ мектептеріне оқулық жағынан көмек берсеңіздер деген өтінішін де жеткізді. Д.Ахметов екі аймақтың бауырлас болуын құптайтындығын айтып, оқулық жағынан жәрдем беру мәселесін облыстық білім басқармасына жүктеді. «Баян-Өлгей аймағында тұратын 102 мың қандасымызға біз әрқашан қол ұшын беріп, көмектесуге әзірміз. Сіздерде өзіміздің дәстүрлі халық емшілігімен айналысып жүргендер бар ма? Ата-бабаларымыз шұғылданған халық медицинасын қайта жандандырып, жаңғыртып, бұл бағытта да бірлесе жұмыс істеуге болады», деді облыс әкімі. Кездесу соңында екі аймақтың әкімдері өзара ынтымақтастықты дамыту туралы меморандумға қол қойды.
Азамат ҚАСЫМ,
«Егемен Қазақстан»
ӨСКЕМЕН
