Әрине, отыз елдің қатарына қосылу деген тек экономикалық көрсеткіштердің мықтылығынан болмайды. Әлемде байлығы басынан асып, «сен же, мен же» болып, ауызынан ақ май ақтарылып отырған мемлекеттер бар. Бірақ, көпшілігі байлық қуалаймыз деп жүріп өз ұлтының болмыс бітімін, бет пердесін мүлде жоғалтып, рухани құндылықтарын бағалай білмегендіктен іштей азып тозудың алдында тұр. Ұлттық идеал, адамгершілік азғындаған бұл елдерде жиіркенішті әрекеттерге барып жатқандығын әлеуметтік желіні ақтарып қалсаңыз «біз осындаймыз» деп алдымыздан шыға келеді.
Алдында Қожа Ахмет Ясауи мен абыз Абайы бар қазақ қоғамы бұл індеттен сау болғанымен жаман дағды, ерсі әрекет, харам әдет тез жұққыш келеді. Сондықтан, Елбасының «Егер жаңғыру елдің ұлттық-рухани тамырынан нәр алмаса, ол адасуға бастайды» деген ойы Қазақстанның ертеңіне алаңдаған әрбір азаматтың көкейінде болуы керек.
«Біз ХХІ ғасырдың жаһандық картасында ешкімге ұқсамайтын, дербес орны бар ұлт боламыз десек, «Жаһандағы заманауи қазақстандық мәдениет» жобасын іске асыруға тиіспіз. Әлем бізді қара алтынмен немесе сыртқы саясаттағы ірі бастамаларымызбен ғана емес, мәдени жетістіктерімізбен де тануы керек» деген Мемлекет басшысының мақаласындағы көтерілген тапсырмаларды ұлыстың ұйытқысы саналатын Оңтүстік Қазақстан облысы ойдағыдай орындап келеді. Облыс басшысы Жансейіт Түймебаев Елбасының тапсырмасына сәйкес жасалуға тиіс жұмыстарды жүйелеп, атқарылуы қажет уақытын белгілеген болатын.
Біз өз тарапымыздан Мемлекет басшысы тапсырған жұмыстардың облыста қалай орындалып жатқандығын сараптап көрдік. Алдын ала озып айтсақ, көңіл тоғайтар іс бар. Мәселен, «Рухани жаңғыру» бағдарламасының қоғамның санасын жетілдірудің 6 бағытын жүзеге асыру аясында облыста 428 түрлі жоспарлы іс-шаралар жүргізілді. 95 жоба жүзеге асырылып жатыр.
Алты арнайы бағытты талдар болсақ, «Қазақ әліпбиінің латын қарпіне көшуі», «Жаңа гуманитарлық білім. Қазақ тіліндегі 100 жаңа оқулық», «Туған жер», «Қазақстанның киелі жерлері», «Қазақстандағы 100 жаңа есім», «Қазіргі заманғы қазақстандық мәдениет жаһандық әлемде» болып бөлінеді.
Жобаларды жүзеге асыруға 2022 жылға дейін бюджеттен 16,2 млрд теңгені бөлу жоспарланып отыр. Мемлекеттік бюджет қорынан басқа демеушілердің де көмегі бар. Түрлі мемлекеттік лауазымдарда, кәсіпкерлер, мәдениет және өнер қайраткерлері болып жұмыс істейтін облыстың атақты тумаларының қатысуымен «Туған жерді түлету – перзенттік парыз» атты іс-шараны өткізіп, оның барысында 296 өңірлік жобаны жүзеге асыруға 3,9 млрд теңгені бөлу туралы шешім қабылданды.
Облыста өңірлік Жобалық кеңсе және Сараптамалық кеңес құрылған. Жобалық кеңсе құрамынан 5 мемлекеттік органның және мемлекеттік мекеменің қызметкері шығарылып, олардың орнына тәуелсіз сарапшылар, ғалымдар үкіметтік емес ұйымдар мен институттар-
да жұмыс атқарып жүрген мамандар енгізілді.
Мемлекет басшысының қойған міндеттер мен тапсырмаларды жүзеге асыру аясында өңірді ерекшелейтін екі жоба жұмыс жасап жатыр.
Олардың біріншісі: «Түркістан – Түркі әлемінің мәдени астанасы» жобасы.
Ағымдағы жылдың басында Түркістан – Түркі әлемінің мәдени астанасы болып ресми түрде жарияланды.
Осыған байланысты, жобаны салтанатты ашу барысында 22 түркі тілдес елдің өкілдері 35 киіз үйден жасалған этноауылда қазақ халқының салт-дәстүрлерімен, мәдениетімен таныстырылды. «Наурызнама» іс-шарасы аясында Есім хан атындағы орталық алаңда түркі халықтарының мәдениеті мен дәстүрлерінің театрлық көрінісі өтті. Түркітілдес елдердің туроператорларының, блогерлері мен БАҚ өкілдерінің пресс-турлары ұйымдастырылды. Түркі әлемінің «Алтын сақа» атты анимациялық фильмдерінің фестивалі өтті. 2017 жылғы сәуір айында ТҮРКСОЙ фотосуретшілерінің XIV және суретшілерінің ХХ кездесуі өтті, олардың нәтижесі бойынша шығармашылық еңбектердің көрмелері ұйымдастырылды. Түркі әлемі елдерінің өкілдерінің халықаралық медиафорумы кең талқыға салынған оқиға болды.
Аталған жоба қоғамдық сананы жаңғырту жөнінде маңызды рөл атқарады. Себебі қойылған мақсаттардың салыстырмалы талдауын әлемдік үрдістер мен трендтердің деңгейіне кеңейтеді.
Ағымдағы жылдың аяғына дейін 42 түрлі шараларды өткізу жоспарлануда. Олардың контенті және ерекшелігі оңтүстікқазақстандықтардың Түркі және басқа әлемнің елдері мен халықтарына қоғамдық сананы жетілдірудің қазақстандық тәжірибесінің нәтижелерін салыстыруға және экстраполяциялауға мүмкіндігі болады.
Екінші маңызды жоба бұл Оңтүстік Қазақстан облысының креативті кино жобаларының циклі.
Облыстың маңызды қасиетті орындары мен археологиялық ескерткіштері туралы кинофильмдерді жасау бойынша деректі, көркем және анимациялық үш бағытта жұмыс жүргізіліп жатыр.
Бүгінде Оңтүстік Қазақстан облысының 8 ортағасырлық ескерткіштері туралы деректі фильмдер түсіріліп жатыр. Олар Сауран, Түркістан, Сидак, Қараспан, Жуантөбе, Күлтөбе ескі қалашықтары, Отырар жазирасының ескерткіштері, Бөржар қорғаны.
Ағымдағы жылдың аяғында Шымкентте «Ежелгі Жетіген құпиялары» атты 13 сериялық тарихи-танымдық фильмнің және «Қажымұкан», «Отырар қорғанысы», «Киелі Қазығұрт» анимациялық фильмдердің тұсаукесері өткізіледі. Түсірілімдер мен өнімдер Қазақстанда ғана емес, шет елдерде де ұлттық мәдениетті насихаттайтын, сонымен қатар халықаралық сыйлықтармен марапатталған «САҚ» және «Оңтүстікфильм» киностудиялары айналысып жатқанын атап өткіміз келеді. Кең халықаралық таным алған «Қазақ елі» фильмін дәл осы «САҚ» киностудиясы түсірген болатын.
Оңтүстікте 800-ден аса тарихи-мәдени ескерткіш бар. Облыстың барлық аудандары мен қалаларында 1, 2 және 3 күндік туристік бағыттар құрылды. Оларға 84 тарихи-мәдени және табиғи нысандар қосылған. Атап айтсақ, туристік бағыттардың негізгі нысандары болып Арыстан баб кесенесі, Қожа Ахмет Ясауи және Әзірет Сұлтан кешені, Бәйдібек ата және Домалақ ана кесенелері, «Отырар», «Сауран» қалашықтары, «Сайрам - Өгем» Мемлекеттік ұлттық табиғи саябағы, «Ақ мешіт» үңгірі және басқалары белгіленген.
Облыстың туристік саласын дамытуды ынталандыру мақсатында «Шырайлы Шымкент – 2017» жәрмеңкесі, «Этноауыл» көрмесі өткізілді. Өңіріміздің қасиетті орындарына 16 мың оқушылар мен студенттердің саяхаты ұйымдастырылды. «Көне Түркістан» жобасы әзірленді. Оның негізгі мақсаты қазақ ұлттық мәдениетін көпшілікке тарату және әлемдік мәдени мұраны сақтау болып келеді.
Бұл бүгінге дейінгі қол жеткізген жобалар. Елбасының барлық қазақстандықтар үшін өзекті мақаласындағы көтерілген мәселелердің келесі кезеңде қандай жұмыстары қолға алынады?
Біз осы сауалды облыс әкіміне қойған едік.
– Қазақстан Республикасының Президенті Нұрсұлтан Әбішұлы Назарбаев мемлекетіміздің алдына әлемдегі озық дамыған 30 елдің қатарына кіру мәселесін қойып отыр. Ол орындалмайтын мақсат емес. Қазір диқанның кетпеніне қараған күн қалған. Елімізге озық технологиялар келіп, еңбек өнімділігі еселеніп жатыр, – деді Жансейіт Қансейітұлы. – Бірақ, экономикалық дамудың жетегінде қалып кетуге болмайды. Елбасының «Болашаққа бағдар: рухани жаңғыру» мақаласы барлық азаматтарымыздың көкейінде жүрген ойды дөп басты. Мемлекет басшысы тапсырма берді ме, ол орындалу керек. Рухани жаңғыру аясында алдағы уақыттарда атқарылатын жұмыстарды саралар болсақ, жұмыс көп. Ғалымдар көне Шымкент шаһарына екі мың жыл деген дерек айтуда. Әр түрлі кезеңдерде сол ескі шаһар маңайы жеке адамдарға беріліп, құрылыс алаңына айналып кеткен екен. Осы мәселеге тоқтау салып, базар басшыларына басқа жер ұсындық.
Маңызды жобалар жоспарланып отыр. Анықтап айтар болсақ:
– Шымкент ескі қалашығының аумағында Ашықаспан астындағы мұражай салынады.
– Әбу Насыр әл-Фараби туылған Оқсыз ескі қалашығын, сонымен қатар Абылай хан ордасы болған Ханқорған ескі қалашығын халық жадында қайта еске түсуіне ерекше көңіл бөлініп жатыр.
– Қожа Ахмет Ясауи кесенесіне отандық және шетел туристерінің үлкен ағымына байланысты және ежелгі тарихты визуализациялау үшін кесенеде көмбеленген тарихи тұлғалардың бюстерін қоюды жоспарлап отырмыз.
– Сонымен қатар ежелгі Отырар мен Арыстан баб кесенесін байланыстыратын жолдың құрылысы жоспарлануда. Оны біз ұлттық қолөнершілеріміздің тұрақты қолданыстағы шеберханасы ретінде безендіруді межелеудеміз.
– Ғалым-шығыстанушы Әбсаттар Дербісәлі тарапынан Түркия және Таяу Шығыстың басқа елдерінің кітапханаларында еңбектері бар, біздің ұлы бабаларымыздың – әл-Фарабидің – 30, Сайрамидің – 3, Ясауидің 5 еңбектерінің библиографиясы дайындалды.
– Өткенде Шардарадағы іс-сапар барысындағы кездесуде барлық қазақ бірігіп жоңғардың белін сындырған Ордабасы биігі туралы жақсы ой айтқан едіңіз?
– Қазақтың барлық жері қасиетті. Өзіңіз де олимпия ойындары және халықаралық жарыстарға барғанда әр мемлекеттегі ерекше ескерткіштерді көрген боларсыз. Менің ұғымымда Ордабасы биігі тек Оңтүстік жұрты үшін ғана емес барша қазақстандықтар үшін ерекше маңызға ие. Жерімізге тұтқиылдан тап қойып, аздаған жылдарда қамсыз отырған қазақты «Ақтабан шұбырынды, алқакөл сұламаға» ұшыратқан жоңғар қолы қазақтың сол кездегі астанасы Түркістанға дейін жаулап алып қойды. Алаштың маңдайына біткен ұлы тұлғалар жатқан Түркістанды жауға беріп қою қазақ үшін үлкен қасірет болғаны анық. Сол кезде қазақтың атақты үш биі Төле би, Қаздауысты Қазыбек және Әйтеке бидің ұйымдастыруымен үш жүздің басы осы Ордабасы биігінде қосылды.
Мұның аяғы қазақты кем жұртқа санаған, айбыны асып, ойындағысын жасаған қалмақтардың қан-жоса болып қырылып, аңырап қашқан «Аңырақай», «Қалмақ қырылған» шайқасына ұласты. Ұлы қазақ сахарасын жоңғардан тазарту Ордабасы биігінен басталды. Тәуелсіздіктің алғашқы жылдары осы биікте туысқан үш мемлекеттің президенттері бас қосып, елдің ертеңі нұрлы болуы жағдайында келелі басқосу өткізді.
Сондықтан, Ордабасы биігі – қазақ үшін ұлық, ерекше орын. Ордабасы биігінде барлық қазақстандықтарға ортақ тарихи ескерткіш бой көтереді. Оны алдағы уақытта көрерсіздер.
«Мемлекет пен ұлт құрыштан құйылып, қатып қалған дүние емес, үнемі дамып отыратын тірі ағза іспетті. Ол өмір сүру үшін заман ағымына саналы түрде бейімделуге қабілетті болуы керек. Жаңа жаһандық үрдістер ешкімнен сұрамай, есік қақпастан бірден төрге озды. Сондықтан, заманға сәйкес жаңғыру міндеті барлық мемлекеттердің алдында тұр. Сынаптай сырғыған уақыт ешкімді күтіп тұрмайды, жаңғыру да тарихтың өзі сияқты жалғаса беретін процесс. Екі дәуір түйіскен өліара шақта Қазақстанға түбегейлі жаңғыру және жаңа идеялар арқылы болашағын баянды ете түсудің теңдессіз тарихи мүмкіндігі беріліп отыр. Мен барша қазақстандықтар, әсіресе, жас ұрпақ жаңғыру жөніндегі осынау ұсыныстардың маңызын терең түсінеді деп сенемін. Жаңа жағдайда жаңғыруға деген ішкі ұмтылыс – біздің дамуымыздың ең басты қағидасы. Өмір сүру үшін өзгере білу керек. Оған көнбегендер тарихтың шаңына көміліп қала береді», деді Мемлекет басшысы өз мақаласында.
Елбасы мақаласы – рухани жаңғырудың жарқын жолы. Осы маңызды мақалада заманға сәйкес жаңғыру, оның ішінде рухани жаңғыру мәселесі жан-жақты талданып, таяу жылдарға ауқымды міндеттер қойылып отыр. Осы орайда облысымызда мақаланың басым бағыттарын ілгерілету, насихаттау мақсатында арнайы спикерлер топтары жасақталып, БАҚ арқылы қызу қолдау шаралары атқарылуда, әлеуметтік желілерде пікірлер жариялануда. Халықты бірлікке, ынтымаққа, татулыққа шақыратын және ұлттық құндылықтарды, салт-дәстүрді дәріптеу мақсатында жүйелі жұмыстар жалғаса береді.
Кез келген бағдарламаның тиімділігінің бағалануы жүргізілген іс-шаралар саны мен есептер бойынша ғана емес, сондай-ақ, жүзеге асырылып жатқан жұмыстарға жергілікті тұрғындардың қолдауы мен оң көзқарасы арқылы көрінеді.
Біздің социологиялық сауалнамамыздың нәтижелері «Рухани жаңғыру» бағдарламасының мақсаттары мен міндеттерін халықтың оң қабылдайтынын көрсетеді. Облысымыздың тұрғындары жергілікті қоғамдастықтар деңгейінде бағдарлама жобаларын жүзеге асыруға белсенді және ең басты - қызығушылықпен қатысуда.
Жақында Созақ ауданының тұрғындары XII ғасырдағы екі тас мүсінін тауып, музейге тапсырды. Отырар ауданында жеке кәсіпкер өз қаржысы есебінен «Алаш» этноауылын салды. Оған қазақстандықтар ғана емес, АҚШ, Польша, Франция, Германия, Түркия туристері де келіп жатыр. Осындай этно ауыл жобасы Шымкент қаласында да жеке кәсіпкер тарапынан жүзеге асырылады.
Елбасы Оңтүстікке келген сапарында зиялы қауыммен кездескенде:
«Оңтүстік Қазақстан – қазақылықтың қаймағы бұзылмаған өлке. Бұл – абыздар мен әулиелердің қасиеті дарыған, Қожа Ахмет Яссауи мен әл-Фарабидің ізі қалған, көне мәдени мұраға бай киелі жер. Қазір бұл өңірде бүкіл ел халқының 16 пайызы тұрады», – деді.
Қазақстан Президенті оңтүстік өңірдің тарихын тұтас Қазақстанның тарихы деуге болатынын атап өтті.
– Оңтүстік Қазақстан облысының өзінде 800-ден астам тарихи-мәдени ескерткіш бар. Әлемге әйгілі жәдігерлеріміздің көпшілігі осында. Түркістан, Отырар, Сайрам, Сауран қалалары, Қожа Ахмет Ясауи, Арыстан баб кесенелері – біздің мақтанышымыз. Осындағы әрбір төбе мен қырқаның, өзен мен көлдің аттары – тұнып тұрған тарих. Мәртөбе, Күлтөбе және Ордабасы – халқымыздың сақталуына әсер еткен қазақтың бірлігі мен тұтастығының қасиетті символы. Біз осының бәрін ұрпақтың санасына сіңіруіміз керек. Жастарды патриотизмге, отаншылдыққа, туған жерді сүюге баулу қажет, – деді Мемлекет басшысы. Өңірде Елбасының тапсырмасы кезең-кезеңімен орындалып жатыр.
Мемлекет басшысының «Болашаққа бағдар: рухани жаңғыру» мақаласы бойынша Оңтүстікте атқарылып жатқан жұмыстардың бірпарасы осы.
Бақтияр ТАЙЖАН,
«Егемен Қазақстан»
Оңтүстік Қазақстан облысы