Бұған дейін БҰҰ Қауіпсіздік Кеңесі (ҚК) бірауыздан Корей Халық Демократиялық республикасына жаңа экономикалық санкциялар қолдану туралы қарар қабылдағанын жазған болатынбыз. ҚК-ның Тұрақты емес мүшесі болып табылатын Қазақстан өкілі де бұл санкцияны қолдап дауыс берген. Бірақ жаңа санкциялар да КХДР басшылығының арынын баса алмады. Ол құрлықаралық баллистикалық зымырандарды сынақтан өткізуді жалғастыра беретінін мәлімдеген болатын.
Бұл зымырандардың АҚШ аумағына дейін жететіні де айтылған. Егер осы зымырандарға ядролық оқтұмсықтар қондырылса, ол ғаламдық соғыстың отын тұтатуы мүмкін. Бұл барлық адамзатты, соның ішінде қазақстандықтарды да алаңдататыны сөзсіз.
Кикілжіңге отқа май құйғандай әсер еткен АҚШ пен Оңтүстік Кореяның кешеден бері басталған бірлескен әскери ойындары. Бұл ойындар он бір күнге созылып, оған АҚШ-тың 17 мыңнан, Оңтүстік Кореяның 50 мыңнан артық солдаттары мен офицерлері қатыстырылады. Сонымен бірге, бұл ойынға Аустралия, Канада, Колумбия, Дания, Жаңа Зеландия, Нидерланд және Ұлыбритания елдерінің әскерлері де тартылған. Сөйтіп, бүгінгі таңда бар әлемнің назары осы проблемаға ауып тұр. Әлемдік ақпарат құралдары әскери ойындардың басталып кеткенін жарыса жазып жатыр. КХДР тарабы сабасына түскендей болып, әзірше бұл арада салқынқандылық көрсетуде. Ким Чен Ын ядролық сынақтар тоқтатыла тұратынын айтты. Трамп оны дұрыс шешім деп жариялады.
Бірақ ол шешімнің қаншалықты ұзаққа барары белгісіз. Ядролық қаруға қол жеткізген бұл елдің алдағы уақытта қандай байламға барары болжалсыз екенін барлық әлем біледі.
Жақсыбай САМРАТ,
«Егемен Қазақстан»
