Тып-тыныш, жайбарақат, сабырлы, байыпты, сұп-суық деген ұғымдар Еріктің шығармашылығына мүлдем жат. Жиырманың жетісіне шыққан албырт жастың отты сезімдері мен өмірге құштарлығынан, ішкі әлемі мен сыртқы тіршілікті үйлестіру барысындағы талпынысынан осындай жанды дүниелер туатын сияқты. Суретшімен елордада өткен Дүниежүзі қазақтарының V құрылтайында танысқан едік. Өзбекстандық жас суретші Ерік Құлманов бүгінде Ташкент облысына қарайтын Бостандық ауданында тұрады. Қазағы көп сол ауданның тумасы. Орта мектепте бейнелеу өнері, сызу пәндерінен сабақ береді. Ташкентте, сондай-ақ, ауданда да шеберханасы бар. Бос уақытын көбінде сол жерлерде өткізеді екен. Өзбекстан көркемсурет академиясының мүшесі, Өзбекстан Ұлттық көркемсурет және дизайн институтының түлегі, бірнеше бәйгелерде суырылып шығып, өзіне бұйырған сыйлықтарды алып жүрген Еріктің елімізге бұл бірінші рет келуі емес. Өзбекстандағы қазақ мәдени орталығының қолдауымен Қазақстанға бірнеше рет келген.
«Дүниежүзі қазақтары қауымдастығы ұйымдастыратын өнер фестивальдарына қатысып жүрмін. Бірінде екінші, бірінде үшінші орын алдым. Өзбекстанда ұйымдастырылатын бәйгелерден де сырт қалған емеспін. Көрмелерге қатысамын. Бала күнімнен таңдағаным осы жол болған соң, бейнелеу өнерінің шыңына шыққым келеді», дейді жас суретші.
Ол орта мектепте оқып жүргенде-ақ сурет салумен айналыса бастаған. Бүгінде бұл салада жұмыс істемесе де әкесі Несіп Құлманов та мамандығы бойынша суретші. Әкенің дарыны қан арқылы балаға берілуінде де, ол жалғастырмаған жолды әрі қарай ұлдың жалғап әкетуінде де бір тылсым бар шығар? Бұл күнде ынтасы мен талабы бар балаларға сурет салудың қыр-сырын үйретіп жүрген ол сурет өнерінің бірнеше жанрында еңбектенуде. Ван Гог, Клод Моне, Гоген сынды дүние жүзіне танымал суретші болуды армандайды. Постимпрессионизм бағытында ізденіп жүрген Ерік Құлманов жеке көрмесін өткізуге дайындық үстінде екенін айтты. Осы күнге дейін салған картинасы 1000-нан асып кеткенімен, көрмелерде, шеберханаларда қолдан-қолға өтіп, көбі сатылып кеткен. Еріктің айтуынша, Ташкентте картиналарға қызығушылық та, сұраныс та баршылық. Бұл оған шабыт береді. Алыстан қол бұлғаған аяулы армандарына талпындырады. Тек енді жеке көрмесінің уақыты ұзап кетпесе болды.
Айгүл СЕЙІЛ,
«Егемен Қазақстан»
