Жерлесіміз 175,7 шақырымға созылған жарыс жолын 4 сағат 24 минут және 58 секундта бағындырды. Екінші болып мәре сызығын «Dimension Data» командасының өкілі Эритреи Мерхави қиып өтті. Ол Луценкодан 42 секундқа қалып қойды. Ал қола жүлдені испандық велошабандоз Марк Солер («Movistar», +0.56) жеңіп алды.
Әлем чемпионы Алексей Луценко қазір 24 жаста. Бұл жеңіс – велошабандоздың гранд-тур кезеңіндегі қол жеткізген ең алғашқы толайым табысы.
Жалпы есепте, Алексей Луценко әзірге +18:43 уақытпен 78-орында келеді. Ал көпкүндікте Ұлыбритания велошабандозы, «Sky» командасының мүшесі Крис Фрум көш бастап тұр. Оның нәтижесі – 18:07:10. «Астана» командасының көшбасшысы Фабио Ару болса, +0:49 уақытпен жетінші орынға табан тіреген.
Жалпы, «Испания Вуэльтасы» көпкүндігі үш аптаға созылатын Тур де Франс және Джиро д’Италия сынды әйгілі велобәйгелерімен деңгейлес жарыс.
Еске салсақ, 2006 жылы біздің атақты жерлесіміз, Лондон-2012 Олимпиадасының чемпионы Александр Винокуров бұл турнирде жеңімпаз болған.
Қайрат ЖҮНІСҰЛЫ,
«Егемен Қазақстан»
