«ЕуроХим» компаниялар тобы республикалық бюджетке мол көлемде салық төлеп отырған ірі инвесторлардың қатарында. Тек биылғы жартыжылдықтың қорытындысы бойынша 900 миллион теңгеден астам қаржы аударылған. Компания қазіргі кезде Жамбыл облысындағы Қаратау фосфорит алабының кен орындарын игеруге арналған инвестициялық жобаларды жүзеге асыруда. Индустрияландыру картасына енген бұл жоба елімізді қажетті минералды тыңайтқыштармен қамтамасыз ететін болады. Бұл туралы «ЕуроХим – Қаратау» ЖШС бақылау кеңесінің мүшесі Еркебұлан Мырзағалиев мәлімдеді.
«ЭКСПО көрмесінде бірегей химиялық кешеннің жобасын таныстыру біз үшін қуанышты жаңалық. Оны жобалауда «ЕуроХим» компаниясының соны технологиялары қолданылды. Осының арқасында фосфат кенін дайын өнім етіп толығымен қайта өңдеп, қоршаған ортаға зиянын тигізетін барлық қалдықтардың көлемін барынша төмендетуге мүмкіндік алып отырмыз. Сумен қамтитын тұйық жүйе судың ағып кетуінің алдын алып, тұтынылатын су көлемін азайтса, қайталама энергия қорларын өзімізде өндіру арқылы тұтынылатын электр қуаты төмендейді» – деді ол.
Шара соңында Еркебұлан Мырзағалиев «Алматы-2005» балалар хоккей командасын құттықтап, марапаттады. Айта кетейік, балалар хоккей компаниясы «EuroChem 2017» халықаралық хоккей сайысынан жеңіспен оралған еді. Қазақстандық жас хоккейшілер финалда ресейлік команданы жеңгені есте. Ал «ЕуроХим – Қаратау» компаниясы балалар хоккей құрамасының демеушісі әрі шабыт берушісі.
Айгүл Сейіл,
"Егемен Қазақстан"