Жиынның негізгі міндеті – қазақстандық бизнеске ауыл шаруашылығындағы және азық-түлік тауарларының өндірісіндегі жобаларды бірлесіп іске асыру үшін әріптестер іздестіруге көмектесу, салаға инвестициялық капитал тарту, агроөнеркәсіптік кешенде бизнес жүргізу үшін жаңа трендтер мен перспективаларды талқылау. Инвестициялық форумда іскерлік қатынастарды қалыптастырудан басқа, отандық бизнестің шетелдік серіктестермен және инвесторлармен тиімді ынтымақтастығына кедергі келтіруі мүмкін бірқатар проблемалық мәселелер де ортаға салынды.
Басқосуды ашып, сөз сөйлеген Премьер-Министрдің орынбасары – Ауыл шаруашылығы министрі Асқар Мырзахметов отырыстың мән-маңызы мен салмағын әңгімелеп, саланың қазіргі ахуалына тоқталды. «Мемлекет басшысы Нұрсұлтан Назарбаев: «Аграрлық сектор экономиканың жаңа драйвері болуы тиіс» деген болатын. Бұл үшін нарықтарда қажет етілетін агроөнеркәсіптік кешен бәсекеге қабілетті өнімдердің өндірісін әртараптандыру қажет», деді ол. Министрдің айтуынша, интеграциялық процестер жағдайында Қазақстанға бәсекелестік басымдықтарға қол жеткізу үшін халықаралық озық тәжірибенің трансферті қажет. Тікелей шетелдік инвестициялар тарту және ауыл шаруашылығы саласында өзара тиімді негізде бірлескен өндіріс құру – бұл қазіргі таңдағы біздің бет алысымыз.
Өздеріңізге мәлім, Қазақстан мемлекеттік реттеу мен инвесторларды қолдау бағытында көптеген жетістіктерге қол жеткізді. Еліміз тартылған инвестицияларға қолайлы жағдай жасау бойынша ТМД елдері арасында көшбасшылардың бірі болып саналады. А.Мырзахметов Қазақстанға инвестиция құя отырып, Қытай, Ресей және ЕЫЭҰ елдері нарығына шығуға мүмкіндік туатынын да тілге тиек етті.
Жиында «ҚазАгро» ұлттық басқарушы холдингінің басқарма төрағасы Нұрлыбек Малелов соңғы 5 жылдың ішінде холдингпен еліміздегі агроөнеркәсіптік кешенге соңғы жылдары 375 млрд теңгеден астам шетелдік инвестиция тартылғанын атап өтті. «Қазақстанда халықаралық инвесторлар үшін артықшылықтардың кеңейтілген спектрі көзделген. Олар – субсидия, несиелер және басқа жеңілдіктер түріндегі салалық артықшылықтар, басым инвестициялық жобаларды іске асыру кезіндегі кедендік баж салығынан босату және тағы басқалар. Ел экономикасының аграрлық секторының қолданыстағы заңнамалық базасы нарық талаптарына, халықаралық практика нормаларына сәйкес келеді және кәсіпкерлік бастамаларды қорғауға, қолдауға бағытталған», деді ол.
Бүгінгі таңда министрлік экспорт саясатын мақсатты түрде жүзеге асыру жұмыстарын жүргізуде. Осыған орай, жаңа экспорттық арналарды ашатын, ал жұмыс істеп тұрғандарды кеңейтетін, ірі экспорттық партияларды АӨК экспорт орталығы құрған. Қытай компанияларымен астықты, майлы дақылдарды, өсімдік майын экспорттау үшін келісімшартқа қол қойылса, Біріккен Араб Әмірліктері мен Иранға жасымық тасу үшін келісімге қол қою қайта өңделуде. Ал Ресей, Израиль, Гонконг елдерінің компанияларымен күнбағыс тұқымын, қатты бидай, ұн, ноқат, бұршақ, қой етін тасымалдау үшін келіссөздер жүргізілуде. ҚХР нарығына сиыр, шошқа етін, сүт, құс өнімдерін, тірі жануарлар, соның ішінде жылқыларды шығару жоспарлануда.
Ауыл шаруашылығы министрлігі Сыртқы істер министрлігімен бірлесіп, Израил, Кувейт мемлекеттерінің ветеринарлық қызметімен қой етін жеткізу жолдарын және Малайзия, Жапония, Оңтүстік Корея, Еуроодақ елдеріне құрғақ бие сүтін экспорттау бағытында жұмыс істеуде. Парсы шығанағы елдерімен тиімді келіссөздер аяқталуға жақын.
Агроөнеркәсіптік инвестициялық форумы аясында Қазақстанның ауыл шаруашылығы саласын экономикалық әртараптандыру тұрғысында бірқатар маңызды келісімдер мен меморандумдарға қол қойылды.
Гүлмира ИСАЕВА, Ауыл шаруашылығы вице-министрі:
– Бірінші жартыжылдықта азық-түлік өндіруде инвестиция көлемі 31,6 млрд теңгені құрады немесе өткен жылдың сәйкес кезеңімен салыстырғанда 21 пайызға өсті. Инвестиция бойынша елеулі өсім Солтүстік Қазақстан (5,4 есе) және Оңтүстік Қазақстан облыстарында (5 есе) байқалды. Өсімдік шаруашылығында ағымдағы бірінші жартыжылдықта инвестиция көлемінің артуы 61 пайызды, ал мал шаруашылығында 27 пайызды құрады.
Шетелдік инвесторларды ауыл шаруашылығы шикізатын өңдеу бағыты қызықтырып отыр, яғни бұл бағытта өсім қарқыны 5,2 пайыз. Осы орайда ұн мен ұннан жасалған және ет өнімдері, шұжық, жартылай фабрикат, консервілік өнімдер қамтылуда. Бұл өз кезегінде Қазақстан шикізатқа бай екенін білдіреді. Қазіргі заманғы қайта өңдеу өндірістерінің санын арттыруда барлық мүмкіндіктерге иеміз. Осы арқылы экспортқа өңделген өніммен шығуға жағдай бар.
Асхат РАЙҚҰЛ,
«Егемен Қазақстан»
Суретті түсірген
Орынбай Балмұрат,
«Егемен Қазақстан»